مەملەكەت باسشىسى ماڭعىستاۋ وبلىسىنا جۇمىس ساپارىمەن كەلدى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
ساپار باراسىندا پرەزيدەنت ماڭعىستاۋ وبلىسى جۇرتشىلىعىمەن كەزدەستى.
«اقتاۋعا كەلەردىڭ الدىندا جاناشىر ءارى اقىلشى اعامىز بولعان ءابىش كەكىلبايەۆ ويىما ورالدى. ابەكەڭ ەكەۋىمىز ءبىراز جىل قىزمەتتەس بولىپ، بىرگە جۇردىك. ءاعا-ىنى رەتىندە سىيلاسىپ، جاقىن ارالاستىق. ەلىمىزدىڭ وتكەنى، بۇگىنى جانە بولاشاعى تۋرالى ءجيى اڭگىمەلەسەتىن ەدىك. ادەبيەت تاقىرىبىندا پىكىر الماستىق. ءقازىر «ءابىش الەمى» دەگەن ۇعىم حالقىمىزدىڭ ساناسىنا ابدەن ءسىڭىپ كەتتى. راسىندا، بىرەگەي تۇلعا، اسا كورنەكتى جازۋشى، تاريحشى، فيلوسوف ءابىش كەكىلبايەۆتى ءبىز جانە وسكەلەڭ ۇرپاق ءارقاشان جادىمىزدا ساقتاۋىمىز كەرەك. بۇل – ءبىزدىڭ ازاماتتىق، ۇلتتىق بورىشىمىز. ابىز اعامىز – بارشا قازاقتىڭ ماقتانىشى. ابەكەڭ تۋعان ولكەسى ماڭعىستاۋدى ەرەكشە جاقسى كورەتىن. قاسيەتتى ورىندارى، قايتالانباس تابيعاتى جانە كەڭپەيىل حالقى تۋرالى سويلەگەندە شابىتتانىپ كەتەتىن. «ماڭعىستاۋدىڭ دارياسى – حالقىنىڭ كوكىرەگىندە» دەپ ءجيى ايتاتىن. وسى وڭىرگە كەلگەن سايىن سول سوزدەردىڭ اقيقات ەكەنىنە كوزىمىز جەتەتىنى انىق. مەن 2019 جىلى ءابىش اعانىڭ ەسكەرتكىشىنىڭ اشىلۋىنا ارنايى كەلەتىنىمدى ايتقان ەدىم. كەيىن سول ۋادەمدى ورىنداپ، اقتاۋدا قازاق حالقىنىڭ ۇلى پەرزەنتىنە ارنالعان ەسكەرتكىشتىڭ اشىلۋ راسىمىنە قاتىستىم. سول سەبەپتى، وزدەرىڭىزبەن كەزدەسۋدى ءابىش اعا تۋرالى ەستەلىكتەن باستاپ وتىرمىن»،- دەدى پرەزيدەنت.