ءداستۇرلى شارا قازاقتىڭ زاڭعار جازۋشىسى مۇحتار اۋەزوۆتىڭ 125 جىلدىعىنا ارنالدى
مەگاپوليستە ورتا ازيا ەلدەرىنىڭ VIII حالىقارالىق تەاتر فەستيۆالى باستالدى. ءىس-شارا ورتا ازيا ەلدەرى مەن تۇركىتىلدەس مەملەكەتتەردىڭ مادەني ىنتىماقتاستىعىن نىعايتىپ، تەاتر ونەرىنىڭ كوركەمدىك كوكجيەگىن كەڭەيتۋگە باعىتتالعان. ياعني ونەر يەلەرى ءۇشىن شىعارماشىلىق يدەيالار الماسۋعا تاپتىرماس الاڭ. وسى فەستيۆالگە قاتىسۋعا 60-قا جۋىق قويىلىم ۇسىنىلعان. الايدا، بايقاۋ شارتتارىنا سايكەس، ونىڭ ىشىنەن 11 سپەكتاكل ىرىكتەلدى.
«فەستيۆالدە ءتۇرلى باعدارلاما بار. سونىڭ ءبىرى SHOWCASE باعدارلاماسى دەپ اتالادى. تەك مەملەكەتتىك تەاترلار عانا ەمەس، جەكەمەنشىك تەترلارعا دا كوڭىل ءبولىنسىن دەگەن نيەتپەن الەمنىڭ 10 ەلىنەن، انگليادان، ءۇندىستاننان تەاتر پروديۋسەرلەرىن شاقىرىپ وتىرمىز. بۇگىننەن باستاپ الماتىداعى كاسىپقوي تەاترلار دا، جەكەمەنشىك تەاترلار دا ساحنادا ونەر كورسەتەدى. قازىرگى تاڭدا تۇركى دۇنيەسى دەگەن اڭگىمەنىڭ ءوربىپ كەلە جاتقانىنا قۋاناتىن ەلمىز. كوبىسىمەن ءتىلىمىز ءبىر، ءدىلىمىز ءبىر بولعاننان كەيىن، ونەر اراسىندا تاجىريبە الماسۋ بولسىن دەگەن نيەتپەن اشىلعان. بۇل فەستيۆال ءوتىپ جاتسا، وعان وسىنشا ەلدەن قاتىسۋشىلار كەلىپ جاتسا، مۇنداي شارالار بىزگە كەرەك دەگەن ءسوز عوي»، – دەيدى م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
فەستيۆالدە وتاندىق تەاترلاردان بولەك، تاتارستان، وزبەكستان، قىرعىزستان، ازەربايجان، تاجىكستان ەلدەرىنەن كەلگەن ۇجىمدار دا ب ا ق سىنايدى. ەل اتىنان ءتورت بىردەي سپەكتاكل قاتىسىپ وتىر. اتاپ ايتقاندا، مۇحتار اۋەزوۆ تەاترى «قان مەن تەر» دراماسىن، عابيت مۇسىرەپوۆ اتىنداعى بالالار مەن جاسوسپىرىمدەر تەاترى «شاعالا» تراگەدياسىن ۇسىنادى. ال قاليبەك قۋانىشبايەۆ اتىنداعى قازاق مۋزىكالىق دراما تەاترى «دون كيحوت» تراگيكومەدياسىن، اقمولا وبلىستىق دراما تەاترى «كوكسەرەك» سپەكتاكلىن قويادى.
«تەاتر ونەرىنىڭ نەگىزى – حالىقتى تاڭقالدىرۋ. وسىندا ۇسىنىلعان قويىلىمداردىڭ بارلىعى كورەرمەنگە ەرەكشە اسەر قالدىرارى ءسوزسىز. مۇنداي حالىقارالىق شارانىڭ وتكىزىلۋى – ارتىستەرگە شىعارماشىلىعىن شىڭداۋعا ۇلكەن سەرپىن بەرەرىنە سەنىمدىمىن. قازىرگى ۋاقىتتا حالىقارالىق تەاتر فەستيۆالى وتە ەرەكشە دەڭگەيدە ۇيىمداستىرىلىپ جاتىر. بۇگىندە قازاقستان تەتار ونەرىندە وزىندىك ءستيلىن قالىپتاستىرىپ كەلە جاتقان جايى بار. وسىنداي شارالاردىڭ كوپتەپ وتكەندىگى ونەر ادامدارىن شىڭداي تۇسەرى ءسوزسىز»، – دەيدى ازەربايجاننان كەلگەن تەاتر فەستيۆالى قازىلار القاسىنىڭ مۇشەسى يسرافيل يسرافيلوۆ.
سونىمەن قاتار، فەستيۆال اياسىندا «قازاقستان سەنوگرافتارىنىڭ» كورمەسى مەن جەكەمەنشىك تەاترلاردىڭ كورسەتىلىمى SHOWCASE ۇسىنىلادى. كورمەگە 20-عا جۋىق قويۋشى-سۋرەتشىلەردىڭ ەڭبەكتەرى قويىلعان. ەلىمىزدىڭ تۇكپىر-تۇكپىرىندەگى تەاترلاردا جۇمىس جاسايتىن ماماندار قاتىسىپ وتىر.
فەستيۆال اياسىندا ءتۇرلى باعدارلاما دا ۇيىمداستىرىلعان. ناقتىراق ايتساق، جەكەمەنشىك تەاترلارعا كوڭىل ءبولۋ ماقساتىندا الەمنىڭ ون ەلىنەن كەلگەن پروديۋسەرلەر الماتىداعى كاسىپقوي تەاترلاردىڭ ونەرىن تاماشالاماق.
تاقىرىپقا وراي
ەسەنگەلدى تۇياقوۆ،
سۋرەتشى:
ءبىزدىڭ سالاعا سۇيىسپەنشىلىك پەن جاۋاپكەرشىلىك قاجەت
-كورمەدە تەاترلاردا قويىلعان سپەكتاكلدەردىڭ ەسكيزدەرى، اكتەرلەردىڭ وبرازىنداعى كيىمدەرى قويىلعان. سونداي-اق، قانداي ماتادان تىگىلگەن، دەكوراسيالار قانداي زاتتاردان جاسالعاندىعى تۋرالى ماعلۇماتتار جازىلىپ تۇر. سوڭعى رەت مۇنداي كورمە 2011 جىلى بولعان ەكەن، ودان كەيىن وتپەدى. ءقازىر ەلىمىزدىڭ تۇكپىر-تۇكپىرىنەن كەلگەن سەنوگرافتاردىڭ ەڭبەكتەرى قويىلىپ وتىر. بۇلاردىڭ بارلىعى دەرلىك مەنىڭ شاكىرتتەرىم. ءوزىم وسى سالادا جۇرگەنىمە 50 جىلدىڭ ءجۇزى بولىپتى. بۇگىندە مىنە، زەينەتكە شىقتىم. الايدا، كومەك كەرەك كەزدە سپەكتاكلدەرگە قاتىسىپ وتىرامىن. سەنوگرافيا دەگەنىمىز وتە كۇردەلى، ءارى ايلىعى وتە از جۇمىس. بۇل سالاعا سۇيىسپەنشىلىك، جاۋاپكەرشىلىك قاجەت. سەبەبى، سەنىڭ تۋىندىلارىڭ ماڭگىلىككە ساقتالادى. قانشاما جىلدار وتسە دە، اكتەرلار وزگەرسە دە. ارت جاعىنداعى دەكوراسيا ەشقاشان وزگەرمەيدى. ول ماڭگىلىككە سول قويىلىممەن بىرگە جاسايدى.
ايدان بيسەمبايەۆا،
قويۋشى-سۋرەتشى:
ۇيىمداستىرۋشىلارعا ەرەكشە ىقىلاسىمدى بىلدىرەمىن
-فەستيۆالدىڭ ءوتىپ جاتقانىنا قۋانىشتىمىن. جاستايىمىزدان تەاتردا ەڭبەك ەتتىك. كورمەگە 3 جۇمىسىمدى ۇسىندىم. «پاپا» اتتى سپەكتاكل تاراز ورىس دراما تەاترىندا قويىلعان. ع.مۇسىرەپوۆ تەاترىندا ساحنالانىپ جۇرگەن «قۇلاگەر»، «ماحاببات، قىزىق مول جىلدار» جانە ت.ب. قويىلىمدارىنىڭ ەسكيزدەرىن اكەلىپ وتىرمىن. كورەرمەن قاۋىمعا ۇناپ جاتىر. وزدەرىنىڭ ىستىق ىقىلاسىن جەتكىزۋدە. وسى رەتتە ۇيىمداستىرۋشىلارعا ەرەكشە ىقىلاسىمدى بىلدىرەمىن.
نۇركەن وتەۋىل،
ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرى:
الماتىدا وتكەنىنە ريزامىن
-مەن فەستيۆالدىڭ الماتىدا ءوتىپ جاتقانىنا قىزىعىپ تا، قىزعانىپ تا تۇرمىن. حالىققا كەرەمەت كوڭىل-كۇي سىيلاپ جاتىر. جان-جاقتان ونەر وردالارى كەلدى، بىر-بىرىمەن تاجىريبە الماسىپ، تەاتردىڭ بۇگىنگى باعىتىن تالقىلايدى. جان-جاقتان سىنشىلار دا كەلىپ وتىر. بۇل دەگەنىڭىز ۇلكەن وقيعا!