الماتىدا نارەستە ساتۋمەن اينالىسقاندار ۇستالدى

قىلمىستىق توپ نارەستەلەردى 1-2 ملن تەڭگەگە باعالاعان.

ءىىم ۇيىمداسقان قىلمىسقا قارسى كۇرەس باسقارماسىنىڭ باسشىسى قانات نۇرماعامبەتوۆتىڭ ايتۋىنشا، الماتىدا جاڭا تۋعان نارەستەلەردى ساتقان قىلمىستىق توپ مۇشەلەرى ۇستالدى، دەپ حابارلايدى Almaty-akshamy.kz

«بيىلعى تامىزدا الماتىدا جاڭا تۋعان نارەستەلەردى زاڭسىز اسىراپ الۋ ماقساتىندا ساتۋ فاكتىلەرى انىقتالدى. قابىلدانعان شارالار ناتيجەسىندە بۇل ىسكە اۋداندىق احاج ءبولىمى قىزمەتكەرىنىڭ قاتىسى بارى انىقتالعان. ول سابيلەرىن تاستاپ كەتكىسى كەلەتىن جۇكتى ايەلدەر مەن بالالارى جوق ەرلى-زايىپتىلاردى ىزدەۋمەن اينالىسقان. سونداي-اق قىلمىستىق توپ بالالاردىڭ جالعان تۋۋ تۋرالى كۋالىكتەرىن جاساعان»، – دەدى سپيكەر.

قىلمىستىق توپ نارەستەلەردى 1-2 ملن تەڭگەگە باعالاعان. ال جالعان قۇجات جاساۋ مەن انىقتاماعا 700 مىڭ تەڭگە سۇراعان.

«بۇگىنگى تاڭدا ۇستالعانداردىڭ جاڭا تۋعان نارەستەلەردى ساتۋدىڭ 6 فاكتىسىنە قاتىسى بارى انىقتالدى. اتالعان فاكتى نەگىزىندە «كامەلەتكە تولماعانداردى ساۋدالاۋ» بابى بويىنشا سوتقا دەيىنگى تەرگەۋ امالدارى باستالدى. بەس كۇدىكتى ۇستالدى، بارلىعى قاماۋعا الىندى»، – دەدى سپيكەر.