بۇگىن استانادا ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قازاقستاننىڭ جاڭا جاھاندىق وزگەرىستەر مەن تەحنولوگيالىق داۋىرگە دايىندىعى تۋرالى ايتتى. پرەزيدەنت الەمدەگى كۇردەلى احۋالدىڭ ەلىمىزدىڭ ەكونوميكاسى مەن تۇرمىس ساپاسىنا تىكەلەي اسەر ەتەتىنىن اتاپ ءوتتى.
– «ءقازىر دۇنيە ءجۇزى تۇبەگەيلى وزگەرىسكە ۇشىراپ جاتىر. جاھاندىق ۇدەرىستەر، ەڭ الدىمەن، ەلىمىزدىڭ ەكونوميكالىق احۋالىنا اسەرىن تيگىزەتىنى انىق. ءبىز سوعان مىندەتتى تۇردە دايىن بولۋىمىز كەرەك. جاڭا تەحنولوگيالىق احۋالعا ساقاداي ساي تۇرۋىمىز قاجەت. بۇل ەلىمىزدىڭ باسەكەگە قابىلەتىن ارتتىرىپ، تۇراقتى دامۋىنا جول اشاتىن اسا ماڭىزدى فاكتور»، – دەدى قاسىم-جومارت توقايەۆ.
پرەزيدەنتتىڭ ايتۋىنشا، ۇكىمەت پەن اكىمدەردىڭ جۇمىسىنىڭ ناتيجەسى ەكونوميكانىڭ دامۋ كورسەتكىشتەرى مەن حالىقتىڭ تۇرمىس ساپاسىنان كورىنەدى. مەملەكەت باسشىسى وتكەن جىلدىڭ نەگىزگى مىندەتتەرىنىڭ ورىندالۋىن تالقىلاپ، الداعى وزەكتى ماسەلەلەردى شەشۋ جولدارىن ايقىنداۋدى تاپسىردى.