مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا وتكەن جىلعى ەكونوميكالىق كورسەتكىشتەرگە توقتالىپ، 2024 جىلعا ارنالعان نەگىزگى مىندەتتەردى ايقىندادى. پرەزيدەنتتىڭ ايتۋىنشا، 2023 جىل كۇردەلى بولعانىمەن، ەل ەكونوميكاسى جاعىمدى كورسەتكىشتەرمەن اياقتالعان.
– «بىلتىر ءبىراز قيىندىق بولعانى راس. ەكونوميكانىڭ دامۋىنا كوپتەگەن جاعىمسىز فاكتورلار ىقپال ەتتى. دەگەنمەن، ءبىز احۋالدى ۋشىقتىرماي، باقىلاۋدا ۇستاي الدىق. جالپى ناتيجە جامان ەمەس دەۋگە بولادى. ءبىراق جايباراقات وتىرۋعا بولمايدى، شەشىمىن تابۋى قاجەت تۇيتكىلدەر ءالى دە كوپ. مۇنى ساراپشىلار دا، ازاماتتار دا جاقسى بىلەدى»، – دەدى پرەزيدەنت.
سونىمەن قاتار، قاسىم-جومارت توقايەۆ قازاقستان ەكونوميكاسىن ءارتاراپتاندىرۋ مىندەتى ءتيىستى دەڭگەيدە ورىندالماعانىن اتاپ ءوتتى.
– «ەكونوميكامىز ۇلتتىق قوردىڭ قارجىسىنا اسا تاۋەلدى بولىپ تۇر. ءبىراق، وسى جەردە اتاپ ءوتۋىمىز كەرەك، ۇلتتىق قور – بۇل مەملەكەتتىك ەكونوميكانىڭ اجىراماس بولىگى. بيزنەستىڭ ينۆەستيسيالىق بەلسەندىلىگى ءالى دە تومەن دەڭگەيدە. بۇل ولقىلىقتاردى بيىلدان قالدىرماي دەرەۋ جويۋ قاجەت. ۇكىمەت ناقتى شارالار قابىلداۋى ءتيىس»، – دەدى مەملەكەت باسشىسى.
پرەزيدەنت ەكونوميكانى تۇراقتاندىرۋ جانە ينۆەستيسيالىق بەلسەندىلىكتى ارتتىرۋ باعىتىندا ۇكىمەتكە ناقتى تاپسىرمالار بەردى. الداعى ۋاقىتتا وسى سالاداعى تۇيتكىلدى ماسەلەلەر شەشىمىن تابۋ ءۇشىن شۇعىل شارالار قابىلداناتىنى بەلگىلى بولدى.