ءقازىر جۇمىس تاڭدامايتىن زامان. باستىسى، ۋاقىتتى ءتيىمدى پايدالانۋ قاجەت. سوندا ويعا العان ءىس العا باسادى.
الەم پاندەميا جاعدايىندا ءومىر سۇرگەلى ءبىرشاما ۋاقىت ءوتتى. ناقتىراق ايتقاندا، 2 جىلدان استى. بۇل جاعداي جاھان جۇرتىن باسقاشا ءومىر سۇرۋگە ۇيرەتتى. سەرۆيستىك قىزمەتتەر جاعى ارتتى. ياعني جەتكىزۋشى بولىپ جۇمىس ىستەيتىن جاستار كوبەيدى. وسىعان وراي ساۋالناما جۇرگىزگەن ەدىك.
شىڭعىس قايرات،
Glovo جەتكىزۋشىسى:
– كارانتين بىزدەردىڭ ءومىرىمىزدى مۇلدە باسقا ارناعا بۇردى. بۇعان دەيىن كۇزەتشى بولىپ ىستەپ ءجۇردىم. اراسىندا ءار جەردە جۇمىس جاسادىم. ءبىر كۇنى تانىسىمدى جولىقتىرىپ قالدىم. اڭگىمەلەسە كەلە، قال-جاعدايىمدى ايتتىم. ول بولسا، مەنى Glovo-عا جۇمىس ىستەۋگە شاقىردى. وسىلايشا جەتكىزۋ قىزمەتىندە جۇرگەنىمە ءبىر جىلدان استى. تابىسى جاقسى. ءقازىر كولىك ساتىپ الدىم. العاشىندا جاياۋ قاتىنادىم. ودان كوپ شارشايسىڭ. بۇگىندەرى تىرلىگىم وڭدالدى. مەنىڭ تۇسىنگەنىم - تىنباي تىرلىك جاساي بەرۋ كەرەك ەكەن. سوندا ءىس وڭادى. قولىم قالت ەتسە، جەكە كاسىپتى اشۋدىڭ جايىن زەردەلەيمىن. جاقىندا دوسىم ەكەۋمىز «ەلەكتروندى سەرۆيستى» دامىتۋدى جوسپارلاپ ءجۇرمىز. ءوز ەلىمىزدە AliExpress، Ozon سىندى جەتكىزۋ قىزمەتتەرىن دامىتقىمىز كەلەدى. الىس-جاقىن شەت ەلگە تانىمال بولسا، قارجىنىڭ ءبىر شەتى قازاقستان ارقىلى اينالىمعا تۇسەتىن بولادى. بىزدەر يگى يدەيالار باعىتىندا قوزعالۋدى ءجون سانايمىز.
ابزال نۇراددينوۆ،
«ياندەكس» جەتكىزۋشىسى:
– وسى جۇمىسپەن اينالىسىپ جۇرگەنىمە – 2 جىل. تاڭعى ساعات 10.00-دەن باستاپ سلوت اشىلادى. سودان باستاپ ءتۇن ورتاسىنا دەيىن جۇرەمىن. ويدا ءبىر-اق نارسە – ۋاقىت الىپ، مول تاپسىرىس قابىلداۋ. تاپسىرىستى قانشالىقتى كوپ الساڭىز، سونشالىقتى تابىستى دا مول تاباسىز. ەڭ باستىسى، ەرىنبەۋ كەرەك. ءدال قازىرگى ۋاقىتتا العان تاپسىرىستارىمدى موپەدپەن جەتكىزەمىن. نەشە ءتۇرلى وقيعالار مەن تۇتىنۋشىلاردى كورەسىز. نەگىزى، وڭاي ءىس جوق. مەن سوندىقتان سابىر ساقتاپ، كۇندەلىكتى ىسىمە تىڭعىلىقتى بولۋعا تىرىسامىن. الدا ءوز ويلاعاندارىما جەتەتىنىمە سەنەمىن. سول جولدا بارىمدى سالامىن. ازىرگە، مۇنىڭ بارلىعى مەن ءۇشىن تاجىربيە. ءقازىر جۇمىس تاڭدايتىن زامان ەمەس. وسىنى ۇقتىم. ءبىراق قۇر جۇرەتىن كەزەڭ كەلمەسكە كەتتى. ويدا ءبىرقاتار كاسىپتەردىڭ جوسپارى تۇر. بۇيىرسا، ءبىرشاما قاراجات جيسام، ويلاعانىمدى ىسكە اسىرۋدى كوزدەيمىن.
ەڭبەك ادامزاتتى ورگە سۇيرەيدى. سونىڭ ىشىندە جاس كۇنىنەن باستاپ ەڭبەككە ەرتە ارالاسقاندار وزادى. جاھانعا اتاعى جايىلعان اۋقاتتى جانداردىڭ ءومىر جولىنا زەر سالساڭىز، ءبارى تاۋەكەلدەن باستاعان. ەڭ نەگىزگىسى، قاي سالادا جۇرسەڭىز دە، ادال ناتيجەلى جۇمىس جاساۋعا نيەتتەگەن ابزال.
ءتۇيىپ ايتقاندا، ەڭبەك ەتە بىلگەن ادام نان ءقادىرىن بىلەدى. تالاپتانعان ازاماتتىڭ بيىك شىڭداردى باعىندىرارى ءسوزسىز.