قازاقستان پرەزيدەنتى قاسىم-جومارت توقايەۆ ۇكىمەتتىڭ قوسىلعان قۇن سالىعىنىڭ (ققس) مولشەرلەمەسىن ارتتىرۋ تۋرالى باستاماسىن قولدايتىنىن مالىمدەدى. مەملەكەت باسشىسى سالىق جۇيەسىن رەفورمالاۋدى ماڭىزدى دەپ ەسەپتەيتىنىن اتاپ ءوتتى، دەپ حابارلايدى aqshamnews.kz.
– «جۇمىستى باستاڭدار. رەفورما قاجەت دەپ ەسەپتەيمىن. ءبىراق قازىرگى كەزدە الدىمىزدا ۇلتتىق قوردان ترانسفەرتتەردى ازايتۋ، ونىڭ جيناقتاۋ فۋنكسياسىن كۇشەيتۋ مىندەتى تۇر. جيناقتالعان قاراجاتتى ءىرى ينفراقۇرىلىمدىق جوبالاردى قارجىلاندىرۋعا باعىتتاۋىمىز قاجەت. وسىلايشا ءبىز مەملەكەتتىڭ دامۋعا باعىتتالعان فۋنكسياسىن كۇشەيتەمىز. مەنىڭ ويىمشا، بۇل ماسەلەنى تەرەڭىرەك زەردەلەۋىمىز كەرەك»، – دەدى پرەزيدەنت.
بۇل قادام سالىقتىق تۇسىمدەردى ۇلعايتۋ جانە ۇلتتىق قوردىڭ جيناقتاۋ قابىلەتىن ارتتىرۋ ارقىلى مەملەكەتتىڭ ەكونوميكالىق تۇراقتىلىعىن قامتاماسىز ەتۋگە باعىتتالعان. پرەزيدەنتتىڭ ايتۋىنشا، جينالعان قاراجات ەلدىڭ ينفراقۇرىلىمىن دامىتۋ جانە ەكونوميكانى ءارتاراپتاندىرۋعا جۇمسالۋى ءتيىس.
قوسىلعان قۇن سالىعىن كوتەرۋ ماسەلەسى ۇكىمەت دەڭگەيىندە جانە ساراپشىلاردىڭ قاتىسۋىمەن تالقىلاناتىن بولادى. بۇل شارانىڭ شاعىن جانە ورتا بيزنەسكە قالاي اسەر ەتەتىنى دە ەگجەي-تەگجەيلى زەرتتەلمەك.