بيىل بيدايدىڭ ءبىر گەكتارىنان 16 سەنتنەر الۋ بولجانىپ وتىر
مەملەكەت باسشىسى سولتۇستىك قازاقستان وبلىسىنىڭ اكىمى قۇمار اقساقالوۆتى قابىلدادى، دەپ حابارلايدى Almaty-akshamy.kz.
قاسىم-جومارت توقايەۆقا وبلىس اكىمى ايماقتىڭ دامۋى جونىندە، اتاپ ايتقاندا، اۋىل شارۋاشىلىعىنىڭ دامۋى، جىلىتۋ ماۋسىمىنا دايىندىق جانە ينۆەستيسيالىق جوبالاردى جۇزەگە اسىرۋ جونىندە باياندادى.
قۇمار اقساقالوۆتىڭ ايتۋىنشا، وڭىردە كۇزگى ەگىن ناۋقانى باستالدى. بيىل بيدايدىڭ ءبىر گەكتارىنان 16 سەنتنەر الۋ بولجانىپ وتىر. وبلىستا 170 مىڭ توننا مينەرالدى تىڭايتقىش ەنگىزىلمەك. ءوڭىر باسشىسى بۇل كورسەتكىش بويىنشا رەسپۋبليكادا سقو كوش باسىندا تۇرعانىن جەتكىزدى.
اگرارلىق سەكتورعا بيىل 180 ميلليارد تەڭگە ينۆەستيسيا تارتىلادى. سولتۇستىك قازاقستان وبلىسىندا قۇنى 76 ميلليارد تەڭگە بولاتىن 31 جوبا جۇزەگە اسىرىلىپ جاتقانى ايتىلدى. سونىمەن قاتار اۋىل شارۋاشىلىعىنا 2،4 مىڭ تەحنيكا الىنعان. ءقازىر ايماقتا 17 ءسۇت فەرماسى، 3 قۇس فابريكاسى، جىلىجاي كەشەنى جانە ماي ەكستراكسيالاۋ زاۋىتى سالىنىپ جاتىر. وڭىردە ءسۇت ءوندىرىسى 26 پايىزعا وسكەن.
پرەزيدەنتكە ونەركاسىپ سالاسىنداعى جوبالار تۋرالى دا ايتىلدى. بيىل كىرپىش زاۋىتى مەن تەمىر بەتون بۇيىمدارى، ىرىمشىك شىعاراتىن ءسۇت زاۋىتى اشىلدى. قاعاز ونىمدەرىن شىعاراتىن فابريكا مەن اۆتوكلاۆتى گازوبلوكتار كاسىپورنى ىسكە قوسىلماق. اجت، ەلەكتر قالقانىنىڭ جابدىقتارى جانە جەڭىل تەمىر قۇرىلىسى سىندى جوبالاردى ىسكە اسىرۋ باستالادى.
جاڭا وقۋ جىلىندا م.قوزىبايەۆ اتىنداعى سولتۇستىك قازاقستان ۋنيۆەرسيتەتىندە زاماناۋي زەرتحانالارمەن جابدىقتالعان وقۋ-زەرتحانالىق كورپۋس اشىلادى. الەمدەگى ۇزدىك 100 جوعارعى وقۋ ورىندارىنىڭ ءبىرى – اريزونا ۋنيۆەرسيتەتىمەن بىرىگىپ، قوس ديپلومدى ءبىلىم الۋعا ستۋدەنتتەردى قابىلداۋ العاش رەت جۇرگىزىلدى.وبلىستا بيىل 401 مىڭ شارشى مەتر تۇرعىن ءۇي پايدالانۋعا بەرىلەدى. ايماقتاعى جولداردى جوندەۋگە بيىل 22 ميلليارد تەڭگە بولىنگەن. بۇل قارجىعا 663 شاقىرىم جول جوندەلەدى. سونىمەن قاتار 55 اۋىلدا سۋ قۇبىرىن تارتۋ جۇمىستارى جۇرگىزىلىپ جاتقانى تۋرالى مالىمەت بەرىلدى.
كەزدەسۋ سوڭىندا قاسىم-جومارت توقايەۆ ەگىن جيناۋ ناۋقانىن جوسپارعا ساي ورىنداۋدى جانە وبلىستاعى وزگە دە جوبالاردى ودان ءارى جالعاستىرۋدى تاپسىردى.