الماتىدا سپورت كۇنىنە وراي «مۋزەي كۋبوگى» ۇلتتىق ويىندار ءتۋرنيرى وتەدى

 ءىس-شاراعا الماتى قالاسىنىڭ 8 اۋدانىنان 100-گە جۋىق بالا قاتىسادى

23 تامىز سپورت كۇنىنە وراي الماتىداعى مەملەكەتتىك ورتالىق مۋزەيدە وقۋشىلارى اراسىندا «مۋزەي كۋبوگى» ۇلتتىق ويىندارى بويىنشا قالالىق سپورتتىق تۋرنير وتەدى، دەپ حابارلايدى Almaty-akshamy.kz.

ومىردە ادامنىڭ دەنساۋلىعىن جاقسارتىپ، ونىڭ جاسىن ۇزارتاتىن، كوڭىلىن ءوسىرىپ، اينالاسىنا سۇيكىمدى دە سىمباتتى، شىدامدى دا جىگەرلى، جيناقى جۇرۋىنە سەپتەسەتىن قۇدىرەتتى كۇش بولاتىن بولسا، ول – دەنە تاربيەسى مەن سپورت. 

23 تامىز كۇنى ساعات 10.00–دەن 17.00-گە دەيىن قازاقستان رەسپۋبليكاسىنىڭ مەملەكەتتىك ورتالىق مۋزەيىندە سپورت كۇنىنە وراي الماتى قالاسىنىڭ مەملەكەتتىك جانە جەكە مەنشىك جالپى ءبىلىم بەرۋ مەكتەپتەرىنىڭ، ليسەي جانە گيمنازيا وقۋشىلارى اراسىندا «مۋزەي كۋبوگى» ۇلتتىق ويىندارى بويىنشا قالالىق سپورتتىق تۋرنير وتكىزىلەدى. 

«مۋزەي كۋبوگى» سپورتتىق ءتۋرنيرى الماتى قالاسى ءبىلىم باسقارماسى قالالىق دەنە شىنىقتىرۋ جانە سپورت ورتالىعىمەن بىرلەسىپ وتكىزىلەدى. ءىس-شارادا «اسىق اتۋ»، «بەس اسىق»، «توعىزقۇمالاق»، «ارقان تارتۋ» سياقتى ۇلتتىق ويىندار تۇرلەرى بويىنشا جارىستار وتەدى.

ءىس-شاراعا الماتى قالاسىنىڭ 8 اۋدانىنان 100-گە جۋىق بالا قاتىسادى.