قاسىم-جومارت توقايەۆ: بۇگىن - وتە ماڭىزدى تاريحي كۇن

ەلىمىز ءوز جارقىن بولاشاعى ءۇشىن بەلسەندى تۇردە داۋىس بەرىپ جاتىر.

پرەزيدەنتتىكتەن ۇمىتكەر قاسىم-جومارت توقايەۆ استاناداعى وقۋشىلار سارايىندا ورنالاسقان №58 سايلاۋ ۋچاسكەسىندە داۋىس بەرىپ، بۇل كۇندى وتە ماڭىزدى تاريحي كۇن دەپ اتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ەڭ الدىمەن، بارشاڭىزدى قۇتتىقتايمىن. بۇگىن - وتە ماڭىزدى تاريحي كۇن. ەلىمىز ءوز جارقىن بولاشاعى ءۇشىن بەلسەندى تۇردە داۋىس بەرىپ جاتىر. ءبارى دۇرىس بولادى دەپ ويلايمىن.شىن مانىندە، بۇل جىل وڭاي بولعان جوق. ءبىراق حالقىمىز جۇمىلىپ، قيىندىقتاردى ەڭسەردى. ەندى الدىمىزدا تۇرعان وتە اۋقىمدى مىندەتتەر، ماقساتتار بار»، - دەدى پرەزيدەنت داۋىس بەرۋ راسىمىنەن كەيىن ب ا ق وكىلدەرىنە بەرگەن سۇحباتىندا.

اتالعان سايلاۋ ۋچاسكەسىنىڭ ءتورايىمى قىمبات مۇقانوۆانىڭ ايتۋىنشا، اتالعان ۋچاسكەدە 2627 ادام تىركەلگەن. قازىرگى ۋاقىتتا ونىڭ 209 سايلاۋشى داۋىس بەرىپ ۇلگەرگەن.

قاسىم-جومارت توقايەۆتىڭ كانديداتۋراسىن بىرنەشە ساياسي پارتيا مەن رەسپۋبليكالىق قوعامدىق بىرلەستىك حالىقتىق كواليسيا رەتىندە ۇسىندى. ورتالىق سايلاۋ كوميسسياسى قاسىم-جومارت توقايەۆتى 12 قازاندا ۇمىتكەر رەتىندە تىركەدى.

قاسىم-جومارت توقايەۆتى قولداۋ جونىندەگى رەسپۋبليكالىق قوعامدىق شتاب وكىلدەرى ەلىمىزدىڭ بارلىق وڭىرلەرىن ارالاپ شىقتى.