قاتار مەملەكەتىنىڭ ءامىرى قازاقستان پرەزيدەنتىن «Diwan Amiri» سارايىندا قارسى الدى. كەلىسسوز الدىندا قۇرمەت قاراۋىلىنىڭ باستىعى مەملەكەتتەر باسشىلارىنا راپورت بەرىپ، ەكى ەلدىڭ ءانۇراندارى شىرقالدى.
قاسىم-جومارت توقايەۆ پەن شەيح ءتاميم بەن حاماد ءال ءتاني بىر-بىرىنە رەسمي دەلەگاسيا مۇشەلەرىن تانىستىردى. بۇدان كەيىن قازاقستان پرەزيدەنتى مەن قاتار مەملەكەتىنىڭ ءامىرى كەلىسسوز جۇرگىزدى، دەپ حابارلايدى almaty-akshamy.kz
مەملەكەت باسشىسى قاتار ءامىرىنىڭ شاقىرۋىن زور ريزاشىلىقپەن قابىل العانىن جەتكىزدى. پرەزيدەنت وسى ەلگە العاش رەت مەملەكەتتىك ساپارمەن كەلىپ وتىرعانىن، سوندىقتان ونىڭ ءمان-ماڭىزى ەرەكشە ەكەنىن اتاپ ءوتتى.
– قاتار – يسلام الەمىندەگى ءبىزدىڭ سەنىمدى ءارى ماڭىزدى ارىپتەسىمىز. ەكى ەلدىڭ قارىم-قاتىناسىنا تىڭ سەرپىن بەرەتىن كەز كەلدى دەپ ويلايمىن. قازاقستان مەن قاتار بايلانىستارىن تولىق ستراتەگيالىق ارىپتەستىك دەڭگەيىنە كوتەرۋدى ۇسىنامىن. ساپار كەزىندە وتە ماڭىزدى قۇجاتتارعا قول قويىلادى. بۇل كەلىسىمدەر ءبىزدىڭ ىنتىماقتاستىعىمىزدى ستراتەگيالىق دەڭگەيگە كوتەرەدى. ءبىز ءۇشىن قاتار وتە ەرەكشە ەل، سىزدەرمەن بايلانىستارىمىزدى جوعارى باعالايمىز. سوندىقتان بۇل قاتىناستارىمىزدى ودان ءارى دامىتۋ ءۇشىن كۇش-جىگەرىمىزدى سالامىز. بىزگە كورسەتىلگەن قوناقجايلىعىڭىزعا ريزاشىلىعىمىزدى بىلدىرەمىز، – دەدى قاسىم-جومارت توقايەۆ.
ءوز كەزەگىندە قاتار مەملەكەتىنىڭ ءامىرى شەيح ءتاميم بەن حاماد ءال ءتاني
قازاقستان پرەزيدەنتى ساپارىنىڭ ءمان-ماڭىزىنا توقتالدى.
– جوعارى مارتەبەلى پرەزيدەنت مىرزا، ءبىزدىڭ ەلىمىزگە ەڭ العاشقى مەملەكەتتىك ساپارمەن كەلىپ وتىرعانىڭىزعا قۋانىشتىمىن. بۇگىنگى كەلىسسوزدەر ەكى ەل اراسىنداعى قارىم-قاتىناستاردى ەسەلەي تۇسەتىنىنە سەنەمىن. ءبىز استانادا دا كەزدەستىك. بۇگىنگى جۇزدەسۋىمىز بۇرىنعى كەلىسسوزدەر نەگىزىندە قول جەتكىزىلگەن ۋاعدالاستىقتاردىڭ جۇزەگە اسىرىلۋىن قاداعالاپ، الداعى جوسپارلاردى ايقىنداۋعا مۇمكىندىك بەرەدى. ەكىجاقتى ىنتىماقتاستىق اياسىندا ەنەرگەتيكالىق، ساۋدا-ەكونوميكالىق جانە ينۆەستيسيالىق جوبالاردى ىسكە اسىرۋعا مۇددەلىمىز. وسى ساپار اياسىندا ءبىزدىڭ ەلدىڭ ءىرى بيزنەس وكىلدەرىمەن كەزدەسۋلەر وتكىزەسىز. بۇل اتالعان سالالارداعى ىقپالداستىقتى ىلگەرىلەتۋگە تىڭ سەرپىن بەرەتىنىنە سەنىمدىمىن، – دەدى قاتار مەملەكەتىنىڭ ءامىرى.
مەملەكەت باسشىسى ءقازىر قازاق-قاتار قارىم-قاتىناستارى كەيىنگى 30 جىلدا ەڭ جاقسى كەزەڭدى باستان وتكەرىپ وتىرعانىن اتاپ ءوتىپ، ءامىردىڭ استاناعا جاساعان مەملەكەتتىك ساپارىن ەسكە سالدى. پرەزيدەنتتىڭ ايتۋىنشا، ەلدەرىمىز اراسىندا تىعىز ساياسي ديالوگ، كەڭەيىپ كەلە جاتقان ەكونوميكالىق سەرىكتەستىك جانە تابىستى مادەني-گۋمانيتارلىق بايلانىستار قالىپتاسقان. ەكى ەل اراسىندا سوڭعى ءۇش جىلدا قول قويىلعان كەلىسىمدەر ءارتۇرلى سالاداعى ىنتىماقتاستىقتى ودان ءارى نىعايتۋعا بەرىك نەگىز بولدى.
قاسىم-جومارت توقايەۆ قاتاردى جاقىن بولاشاقتا قازاقستانداعى ەڭ ءىرى ينۆەستورلاردىڭ وندىعىنا كىرەدى دەپ ەسەپتەيتىنىن جەتك. پرەزيدەنت قازاقستاننىڭ قاتار نارىعىنا جالپى قۇنى 250 ميلليون دوللار بولاتىن 60 شيكىزاتتىق ەمەس تاۋار ءتۇرى بويىنشا ەكسپورتتى ۇلعايتۋعا دايىن ەكەنىن ايتتى. سونىمەن قاتار جاقىن ارادا تاۋار اينالىمىن 500 ميلليون دوللارعا دەيىن ارتتىرۋ تۋرالى ايتىلدى.
كەلىسسوز بارىسىندا اۋىل شارۋاشىلىعى، كولىك-لوگيستيكا، تۋريزم ماسەلەلەرى تالقىلاندى. اتاپ ايتقاندا، مەملەكەت باسشىسى قاتاردى شىعاناق پەن ورتالىق ازيانى بايلانىستىراتىن ينتەرمودالدى كولىك جەلىسىن دامىتۋ ءۇشىن كۇش-جىگەر بىرىكتىرۋگە شاقىردى. بۇل ايماقتاعى ەكونوميكالىق بەلسەندىلىكتى ىنتالاندىرۋعا ىقپال ەتەدى. 2030 جىلعا قاراي سۋارمالى جەر كولەمىن 3 ميلليون گەكتارعا دەيىن ۇلعايتۋدى جوسپارلاپ وتىرعان ەلىمىز ءقازىر بيداي مەن ۇن ءوندىرۋ بويىنشا الەمدە العاشقى وندىققا كىرەدى. قاسىم-جومارت توقايەۆ اۋىل شارۋاشىلىعى سالاسىنداعى ىنتىماقتاستىقتى ارتتىرۋعا نەگىز بار ەكەنىنە نازار اۋداردى.
سونىمەن قاتار مادەني-گۋمانيتارلىق بايلانىستاردى نىعايتۋ ماسەلەسى تالقىلاندى. مەملەكەت باسشىسى 2025 جىلى ەكى ەل استانالارىندا قازاقستان مەن قاتاردىڭ مادەنيەت كۇندەرىن ۇيىمداستىرۋدى ۇسىندى. بۇل شارالار مادەني مۇراسى باي حالىقتارىمىزدى جاقىنداتا تۇسەتىنىنە سەنىم ءبىلدىردى.
بۇدان بولەك، ايماقتىق جانە حالىقارالىق كۇن تارتىبىندەگى وزەكتى ماسەلەلەر قاراستىرىلدى.