اكسيونەرلىك قوعامنىڭ بيىلعى قارجىلىق قورىتىندىلارى تۋرالى ەسەپ بەرىلدى.
مەملەكەت باسشىسى «سامۇرىق-قازىنا» اق باسقارما ءتوراعاسى الماسادام ساتقالييەۆتى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆقا «سامۇرىق-قازىنا» اكسيونەرلىك قوعامىنىڭ بيىلعى اتقارعان قىزمەتىنىڭ نەگىزگى وندىرىستىك كورسەتكىشتەرى مەن قارجىلىق قورىتىندىلارى تۋرالى ەسەپ بەرىلدى.
الماسادام ساتقالييەۆتىڭ ايتۋىنشا، قوردىڭ بيىلعى تابىسى 10،5 تريلليون تەڭگە بولادى دەپ بولجانىپ وتىر. بۇل جوسپارلى كورسەتكىشتەن 22 پايىز جوعارى. بۇعان مۇناي باعاسىنىڭ كوتەرىلۋى، جۇك تاسىمالى مەن ترانزيت كولەمىنىڭ ۇلعايۋى، سونداي-اق ەلەكتر قۋاتىن ءوندىرۋ جانە تاراتۋ كورسەتكىشتەرىنىڭ ارتۋى نەگىزگى فاكتور بولدى.
سونىمەن قاتار مەملەكەت باسشىسىنا الەۋمەتتىك جانە ينفراقۇرىلىمدىق نىسانداردى قارجىلاندىرۋعا قاتىستى تاپسىرمالارىنىڭ ورىندالۋى جونىندە مالىمەت بەرىلدى. اتاپ ايتقاندا، گازبەن جانە سۋمەن قامتۋ، كولىك جانە ەنەرگەتيكا سالالارىنداعى 11 باسىم جوبانىڭ ىسكە اسىرىلۋ بارىسى تۋرالى باياندالدى. قوردى باسقارۋ كەڭەسى جوبالاردى ماقۇلداپ، مەملەكەت باسشىسىنىڭ جولداۋىن جۇزەگە اسىرۋ جونىندەگى جالپىۇلتتىق ءىس-شارالار جوسپارىنا ەنگىزدى.