بۋرابايدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ ايەلدەر كولونياسىنداعى جاعدايعا بايلانىستى ءوز پىكىرىن ءبىلدىرىپ، بۇل ماسەلەنى قايتا قاراۋدى ۇسىندى، دەپ حابارلايدى aqshamnews.kz
«تاعى ءبىر ماڭىزدى ماسەلە. ماعان بەلگىلى ادۆوكات ايمان وماروۆا حات جولدادى. ول ءوز حاتىندا كۇردەلى تاقىرىپتى قوزعاپ، ايەلدەر كولونياسىنداعى احۋالعا توقتالدى. اسىرەسە، جۇكتى ايەلدەر مەن كىشكەنتاي بالالارى بار ايەلدەردىڭ جاعدايىنا باسا نازار اۋداردى»، – دەدى پرەزيدەنت.
قاسىم-جومارت توقايەۆ ەلىمىزدەگى قىلمىستىق-اتقارۋ جۇيەسىنىڭ باستى ماقساتى سوتتالعان ازاماتتاردى جازالاۋ ەمەس، تۇزەتۋ بولۋى كەرەك ەكەنىمەن كەلىسەتىنىن ايتتى.
«ەر ادام نەمەسە ايەل بولسىن، باس بوستاندىعىنان ايىرىلعانداردىڭ ءبارى زاڭ الدىندا بىردەي ەكەنى تۇسىنىكتى»، – دەپ اتاپ ءوتتى ول.
الايدا، مەملەكەت باسشىسى ادامگەرشىلىك قۇندىلىقتاردى باسشىلىققا الا وتىرىپ، «زاڭ مەن ءتارتىپ» قاعيداتىن ساقتاي وتىرىپ، كامەلەتكە تولماعان بالاسى بار ايەلدەرگە قاتىستى كەيبىر زاڭدىق ۇستانىمداردى قايتا قاراۋعا بولاتىنىن ايتتى.
«قۇقىق قورعاۋ ورگاندارى مەن دەپۋتاتتار وسى ماسەلەنى بايىپتى ءارى جان-جاقتى زەرتتەپ، شەشىم قابىلداۋ ءۇشىن ۇسىنىستار ەنگىزۋى كەرەك»، – دەدى قاسىم-جومارت توقايەۆ.