بۋرابايدا پرەزيدەنتتىڭ قاتىسۋىمەن ۇلتتىق قۇرىلتاي ءوتىپ جاتىر.
جيىندا مەملەكەت باسشىسى قاسىم-جومارت توقايەۆ وتاندىق كينويندۋستريا جايىنا دا توقتالدى. پرەزيدەنتتىڭ سوزىنشە، ءقازىر كينوتەاتردا كورسەتىلەتىن فيلمدەرگە قاتىستى قوعامدىق سىن بار.
«بىلتىر قازاقستاندىق ماماندار تۇسىرگەن 94 فيلم شىققان، ياعني، نەگىزىنەن ءوزىمىزدىڭ ءونىم شىعارىلىپ جاتىر. بۇل – جاقسى ءۇردىس. ءبىراق ءبىز ەڭ الدىمەن سانعا ەمەس، ساپاعا كوڭىل اۋدارۋىمىز كەرەك. كورەرمەننىڭ كوڭىلىن كوتەرىپ، كۇلكى سىيلاۋ – ءبىر بولەك، جاعىمسىز ادەتتەردى ناسيحاتتاۋ – ءبىر باسقا. زورلىق-زومبىلىقتى، قاتىگەزدىك پەن قىلمىستى ناسيحاتتايتىن فيلمدەر دە پايدا بولدى. وسى جەردە ءبىر نارسەنى ەسكەرگەن ءجون. بۇگىندە فيلمدەردىڭ باسىم كوپشىلىگى مەملەكەتتىك تاپسىرىسپەن ەمەس، جەكە قارجىعا تۇسىرىلۋدە. كينو ماڭىزدى يدەولوگيالىق قۇرال ەكەنىن ءبارىمىز جاقسى تۇسىنەمىز. سوندىقتان جەكە قارجىعا تۇسىرىلسە دە، ءفيلمدى كينوتەاترعا شىعارماس بۇرىن الدىن الا سۇزگىدەن وتكىزۋ جولدارىن قاراستىرعان ءجون»، - دەدى پرەزيدەنت.
سونداي-اق پرەزيدەنت جاقىندا شىققان «شوقان. قاشقاريا ساپارى» ءمۋلتفيلمى جايلى دا ءوز ويىن ايتتى.
«بۇل وسكەلەڭ ۇرپاققا ايگىلى تاريحي تۇلعا شوقان ءۋاليحانوۆ تۋرالى مالىمەت بەرەتىن وتە جاقسى تۋىندى دەپ ايتۋعا بولادى. قازاق تىلىندە ۇلتتىق ناقىشتا تۇسىرىلگەن وسىنداي مۋلتفيلمدەر كوپ بولۋى قاجەت. بۇل – ۇلت بولاشاعىنا تىكەلەي ىقپال ەتەتىن ماسەلە. سوندىقتان انيماسيانى دامىتۋ ماسەلەسىن قولعا الۋ كەرەك»، - دەدى مەملەكەت باسشىسى.