بۋرابايدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ كاسىبي تەحنيكالىق كوللەدجدەردىڭ جاڭا ماماندىقتارعا سۇرانىستى جانە ەڭبەك نارىعىنداعى جاعدايدى ەسكەرىپ جۇمىس ىستەۋى قاجەتتىگىن اتاپ ءوتتى، دەپ حابارلايدى aqshamnews.kz
«دميتريي پاۆلەنكو دۇرىس ماسەلە كوتەردى. كاسىبي تەحنيكالىق كوللەدجدەر جاڭا ماماندىقتارعا سۇرانىستى جانە ەڭبەك نارىعىنداعى جاعدايدى ەسكەرۋگە ءتيىس»، – دەدى پرەزيدەنت.
قاسىم-جومارت توقايەۆ ساراپشىلاردىڭ پىكىرىنە سىلتەمە جاساپ، الداعى جىلدارى سولتۇستىكتەگى حالىقتىڭ سانى ەداۋىر ازايىپ، وڭتۇستىكتەگى تۇرعىندار الدەقايدا كوبەيۋى مۇمكىن ەكەنىن ايتتى.
«بۇل – وتە وزەكتى ماسەلە. سەبەبى ايماقتاردىڭ ەڭبەك نارىعىندا تەڭسىزدىك ودان ءارى ۋشىعا تۇسەدى دەگەن ءسوز»، – دەدى مەملەكەت باسشىسى.
پرەزيدەنت وسى ماسەلەنى ۇكىمەتتىڭ مۇقيات قاراۋى كەرەك ەكەنىن اتاپ ءوتىپ، قوستانايداعى كوللەدجدىڭ تاجىريبەسىن سولتۇستىك ايماقتاردا كەڭىنەن قولدانۋدى ۇسىندى.