مەملەكەت باسشىسى ساۋد ارابياسى كورولدىگى كونسۋلتاتيۆتىك كەڭەسىنىڭ ءتوراعاسىن قابىلدادى
قاسىم-جومارت توقايەۆ ساۋد ارابياسى كورولدىگى كونسۋلتاتيۆتىك كەڭەسىنىڭ ءتوراعاسى ابداللا ءال اش-شەيحتى قابىلدادى.
قازاقستان پرەزيدەنتى ساۋد ارابياسىن يسلام الەمىندەگى سەنىمدى سەرىكتەس ءارى قازاقستاننىڭ تاۋەلسىزدىگىن تانىعان العاشقى اراب مەملەكەتتەرىنىڭ ءبىرى ەكەنىن اتاپ ءوتتى.
«ساۋد باسشىلىعىمەن ءاردايىم بايلانىستامىز. تامىزدا تاق مۇراگەرى مۇحاممەد بەن سالمان ءال ساۋدمەن تەلەفون ارقىلى اڭگىمەلەسكەن كەزدە ءبىرقاتار ۋاعدالاستىقتارعا قول جەتكىزىلدى. ال قىركۇيەك ايىندا ينۆەستيسيا ءمينيسترى حاليد ال-فاليحپەن كەزدەستىم. بۇل بايلانىستار ەكى ەل اراسىنداعى ىنتىماقتاستىققا سەرپىن بەرەدى دەپ ەسەپتەيمىن»، – دەدى مەملەكەت باسشىسى.
كەزدەسۋدە ەكىجاقتى ساۋدا-ەكونوميكالىق قارىم-قاتىناستار تالقىلاندى. قاسىم-جومارت توقايەۆ ساۋد كومپانيالارىنىڭ الەمدىك نارىقتاعى مۇمكىندىكتەرى مەن تاجىريبەسىن ەسكەرە وتىرىپ، قازاقستانداعى جوبالارعا بەلسەندى قاتىسۋعا شاقىردى.
ساۋد ارابياسى كورولدىگى كونسۋلتاتيۆتىك كەڭەسىنىڭ ءتوراعاسى ابداللا ءال اش-شەيح قابىلداعانى ءۇشىن قازاقستان پرەزيدەنتىنە العىس ايتىپ، ەلىمىزدەگى ساپارىنىڭ تابىستى ءوتىپ جاتقانىن ايتتى.
«مەن باۋىرلاس، دوستاس قازاقستانعا كەلگەنىمە قۋانىشتىمىن. ءبىز پارلامەنتتىك دەڭگەيدە ءبىرقاتار جەمىستى كەزدەسۋ وتكىزدىك. مۇنداي جۇزدەسۋلەر ەلدەرىمىزدى جاقىنداستىرا تۇسەدى. مەملەكەتتەرىمىزدىڭ باسشىلارى دەڭگەيىندە قابىلدانعان شەشىمدەردى جۇزەگە اسىرۋدا وسىنداي ساپارلاردىڭ ءمانى زور دەپ ەسەپتەيمىن»، – دەدى ساۋد ارابياسى كورولدىگى كونسۋلتاتيۆتىك كەڭەسىنىڭ ءتوراعاسى.
سونىمەن قاتار ەكى ەل اراسىنداعى تاۋار اينالىمىن ارتتىرۋ ماسەلەلەرى تالقىلاندى.
كەزدەسۋ سوڭىندا قاسىم-جومارت توقايەۆ ابداللا ءال اش-شەيحتى ءىى دارەجەلى «دوستىق» وردەنىمەن ماراپاتتادى.