مەگاپوليس اكىمى باقىتجان ساعىنتايەۆ «تورەگەلدى شارمانوۆ قورى» قامقورشىلىق كەڭەسىنىڭ جيىنىنا قاتىستى. جيىن بارىسىندا دەنساۋلىق ساقتاۋدى دامىتۋعا ەلەۋلى ۇلەس قوسقان شەتەلدىك جانە قازاقستاندىق عالىمداردىڭ ەڭبەگى اتاپ ءوتىلدى، دەپ حابارلايدى almaty-akshamy.kz
پروفەسسور تورەگەلدى شارمانوۆتى تۋعان كۇنىمەن قۇتتىقتاي وتىرىپ، الماتى اكىمى باقىتجان ساعىنتايەۆ ونىڭ وتاندىق دەنساۋلىق ساقتاۋ جۇيەسىنىڭ قالىپتاسۋى مەن دامۋىنا قوسقان زور ۇلەسىن اتاپ ءوتتى.
باقىتجان ساعىنتايەۆ كوروناۆيرۋس پاندەمياسىنا قارسى كۇرەسىپ جۇرگەن مەديسينا قىزمەتكەرلەرىنە العىس ايتتى. بۇكىل قوعامنىڭ كۇش-جىگەرىنىڭ، ازاماتتاردىڭ جاۋاپكەرشىلىگىنىڭ ءارى مەديكتەردىڭ ەرلىككە تولى جۇمىستارىنىڭ ارقاسىندا پاندەميا شەگىنە باستادى.
2021 جىلعى 16 اقپاندا قازاقستاندا «تورەگەلدى شارمانوۆتىڭ حالىقارالىق قورى» قۇرىلدى، ونىڭ قىزمەتى دەنساۋلىققا قاتىستى جالپىعا بىردەي قۇقىق يدەياسىن دامىتۋعا باعىتتالعان. قور قىزمەتى اياسىندا شارمانوۆتىڭ حالىقارالىق سىيلىعىنىڭ لاۋرەاتتارىنا ماراپاتتار سالتاناتتى تۇردە تابىس ەتىلدى. القالى ماراپاتقا العاشقى مەديسينالىق-سانيتارلىق كومەكتى دامىتۋعا قوسقان ۇلەسى ءۇشىن دجونس حوپكينس ۋنيۆەرسيتەتىنىڭ شەتەلدىك عالىمدارى ديەۆيد بيشاي مەن مايك شلايف، سونداي-اق قازاقستاندىق دارىگەرلەر، COVID-19 دياگنوستيكاسى مەن ەمدەۋ حاتتاماسىن ازىرلەۋشى ينفەكسيونيستەر – باقىت كوشەروۆا مەن امانگۇل دۇيسەنوۆا يە بولدى.
«تورەگەلدى شارمانوۆتىڭ حالىقارالىق قورىنىڭ» ميسسياسى دەنساۋلىق ساقتاۋ جانە دۇرىس تاماقتانۋ سالاسىنداعى جاس جانە بولاشاعى زور عالىمداردىڭ جوبالارىن قولداۋ بولىپ تابىلادى. بۇدان باسقا، قور ديەتولوگيامەن اينالىساتىن الەمدىك اكادەميالىق ورتالىقتاردا مامانداردىڭ تاعىلىمداماسىنا گرانتتار بەرۋدى جوسپارلاۋدا.
تورەگەلدى شارمانوۆ – ەلىمىزدەگى مەديسينانىڭ ءىرى ۇيىمداستىرۋشىلارىنىڭ ءبىرى، قازاقستان مەن ورتالىق ازيا رەسپۋبليكالارىنداعى نۋتريسيولوگتار مەكتەبىنىڭ نەگىزىن قالاۋشى. ول 1978 جىلى الماتىدا دۇنيەجۇزىلىك دەنساۋلىق ساقتاۋ ۇيىمى مەن يۋنيسەف قامقورلىعىمەن العاشقى مەديسينالىق-سانيتارلىق كومەك جونىندەگى حالىقارالىق كونفەرەنسيانى وتكىزۋدىڭ باستاماشىسى رەتىندە الەمدىك جانە قازاقستاندىق دەنساۋلىق ساقتاۋعا زور ۇلەس قوستى. كونفەرەنسيا قورىتىندىسى بويىنشا الەمدىك دەنساۋلىق ساقتاۋداعى نەگىزگى قۇجاتتاردىڭ ءبىرى – الماتى دەكلاراسياسى قابىلداندى، وندا العاشقى مەديسينالىق-سانيتارلىق كومەكتىڭ ۇلتتىق جۇيەسىن ۇيىمداستىرۋ تۇجىرىمداماسى العاش رەت باياندالدى.