مۋزەي ەسىكتەرى 18 مامىردا ساعات 14.00-دەن 00.00-گە دەيىن اشىق.
2023 جىلعى 18 مامىردا ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيى «MEDIKER» مەديسينالىق كومپانياسىنىڭ سەرىكتەستىگىمەن مۋزەيى ءتۇنى 2023 جوباسىن ۇسىنادى، دەپ حابارلايدى Almaty-akshamy.kz
اكسيا حالىقارالىق مۋزەيلەر كۇنىنە ورايلاستىرىلعان. وسى تۇندە مۋزەي الاڭدارىندا سەرگەي چەرۆياكوۆتىڭ پانتوميما تەاترىنىڭ قويىلىمدارىن، «Lumiere» شوۋىن، يرينا ۆاسيليەۆا مەن ەلەنا حوۆانسكايانىڭ «وت ۆينتا» اتتى باس كيىمدەردىڭ اۆتورلىق كوللەكسياسىنىڭ ءسان دەفيلەسىن، ت. جۇرگەنوۆ اتىنداعى قازاق ۇلتتىق ونەر كوللەدجىنىڭ اكتەرلىك شەبەرلىك فاكۋلتەتى ستۋدەنتتەرىنىڭ تەاترلىق ەتيۋدتەرىن كورۋگە بولادى. كەشتىڭ ەرەكشە قوناعى –ۆەنەرا ۋرازبەكوۆا «الەم مۋزىكاسى» باعدارلاماسىن ۇسىنادى.
سونداي-اق، ءىس-شارانىڭ مۋزىكالىق بەزەندىرىلۋىن الماتى قالاسى اكىمىنىڭ كونسەرتتىك وركەسترى، «مۇراگەر» دومبىراشىلار ءانسامبلى، «اق-داريعا» قوبىزشىلار ءانسامبلى، پيانيست لاززات المۇحامبەتوۆا، الماتى-قازاقستان ءۇندى كلاسسيكالىق بي جانە يوگا ورتالىعى، دارىندىلار اكادەمياسى-KZ ۇلتتىق قۇندىلىقتاردى قولداۋ ورتالىعى قامتاماسىز ەتەدى.
جۇمابەكوۆا گۇلايىم، ءابىلحان قاستەيەۆ اتىنداعى ق ر ءموم ديرەكتورى: «مۋزەي جالپى بەلگىلەنگەن تاقىرىپتى ۇستانا وتىرىپ، جىل سايىن وسى حالىقارالىق اكسياعا قاتىسىپ تۇرادى. ءبىز مۋزەيگە دەگەن قىزىعۋشىلىقتى ارتتىرۋ ءۇشىن ارنايى، شىعارماشىلىق شەشىمدەردى قولدانۋعا تىرىسامىز. ICOM-نىڭ (حالىقارالىق مۋزەيلەر كەڭەسى) 2023 جىلى جاريالاعان تاقىرىبى «مۋزەيلەر، تۇراقتىلىق جانە ءال-اۋقات». وسىعان بايلانىستى ءبىز دەنساۋلىقتى ساقتاۋعا قاتىستى وزەكتى تاقىرىپتى العا تارتا وتىرىپ، «ەمدەۋ ونەرى» قورىنان كورمە اشامىز. ەكسپوزيسيادا قازاقستاندىق جانە شەتەلدىك ونەردى بەينەلەيتىن كەسكىندەمە، گرافيكا جانە ءمۇسىن تۋىندىلارى ۇسىنىلعان. اۆتورلار ءوز ەڭبەكتەرىندە مەديسينا قىزمەتكەرلەرىنىڭ ەرەن ەڭبەگىنە شىن جۇرەكتەن قۇرمەتىن بىلدىرگەن. مۋزەي ءتۇنى مۋزەي سالاسىندا قىزمەت اتقاراتىن ماماندار مەن كورەرمەندەردىڭ كەڭ اۋقىمى ءۇشىن جىلدىڭ باستى وقيعاسى بولىپ تابىلادى».
قاسىموۆا ورىنتاي، "مەديكەر" ج ش س باسقارما ءتوراعاسىنىڭ ورىنباسارى: «ءبىز قازاقستانداعى حالىققا بىلىكتى مەديسينالىق قىزمەت كورسەتەتىن ەڭ ءىرى مەديسينالىق كومپانيامىز جانە سوڭعى جيىرما جىل ىشىندە ەلىمىزدىڭ بارلىق وڭىرلەرىندە مەديسينالىق ينفراقۇرىلىم قۇرا وتىرىپ، قازاقستاننىڭ دەنساۋلىق ساقتاۋ سالاسىن دامىتۋعا ۇنەمى ينۆەستيسيا سالىپ كەلەمىز. وسى ارقىلى ساپالى، ءقاۋىپسىز جانە ءتيىمدى مەديسينالىق قىزمەتتەردىڭ قولجەتىمدىلىگىن قامتاماسىز ەتەمىز. Mediker كومپانياسى كورپوراتيۆتىك-الەۋمەتتىك جاۋاپكەرشىلىك اياسىندا، سونداي-اق بۇۇ-نىڭ جاھاندىق شارتىنىڭ قاتىسۋشىسى رەتىندە ازاماتتاردى ءوز دەنساۋلىعىن ونەر جانە مۋزەيمەن سەرىكتەستىك قارىم-قاتىناس ورناتۋ ارقىلى ساقتاۋ جانە الدىن الۋ قاجەتتىلىگى تۋرالى حاباردارلىقتى ارتتىرۋ ماقساتىندا بيىلعى جىلى مۋزەي ءتۇنى سياقتى ماڭىزدى مادەني ءىس-شاراعا دەمەۋشىلىك جاسايدى. ءبىز مادەني جوبالارعا ينۆەستيسيا سالۋ ارقىلى ونەردى ناسيحاتتاپ، سۇلۋلىقتان ءلاززات الىپ قانا قويماي، جالپى قوعامىمىزدىڭ دامۋىنا جانە وركەندەۋىنە جاعداي تۋعىزاتىنىمىزعا سەنىمدىمىز.
«مۋزەي ءتۇنى» ̶ ءبىز ءۇشىن ونەر مەن مەديسينا اراسىنداعى بايلانىستى پاش ەتەتىن تاماشا مۇمكىندىك. سەبەبى، ونەر مەن مەديسينانىڭ تامىرى ورتاق ̶ بۇل ەكى سالا شىعارماشىلىق جانە زەردەلى ويلاۋ قابىلەتىنىڭ جوعارى دارەجەسىن تالاپ ەتەدى. ونەردە مەديسينا ءبىلىمىنىڭ جانە داعدىلاردىڭ ەۆوليۋسياسىن كورۋگە بولادى. ءار ءتۇرلى داۋىرلەردەگى اناتوميا ساباقتارى، پاسيەنت پەن دارىگەردىڭ ءوزارا ارەكەتتەسۋى، ادام ءومىرىنىڭ مەتافيزيكالىق ماعىنالارى، ونىڭ نازىكتىگىن ءفالسافالىق تۇرعىدان ءتۇسىنۋ. اتاقتى دارىگەرلەردىڭ بەينەلەرى ولاردىڭ پورترەتتەرىن جاساۋعا شابىتتاندىرادى. مەديسينالىق تاجىريبەدە ونەر ساباقتارى، ماسەلەن: ارت-تەراپياسى، ءتۇرلى تۇستەردى قابىلداۋ جانە عاجايىپ اۋەندەردى تىڭداۋ اسەرى كوپتەگەن اۋرۋلاردى ەمدەۋگە ىقپال ەتەدى، ال تاماشا ونەر تۋىندىلارى ىشكى دەرتىڭدى باسادى. قازىرگى زامان ونەرىن بۇگىنگى الەمنىڭ پروبلەمالارىن ءبىلدىرۋ جانە ولاردى شەشۋگە مۇمكىندىك بەرەتىن جولدارىن ىزدەستىرۋ قۇرالى رەتىندە كورە وتىرىپ، ءبىز وزىندىك كوركەمدىك-عىلىمي الاڭ قۇردىق، وسى ارقىلى سۋرەتشىلەر مەن عالىمدار اراسىندا تۇراقتى دامۋ مەن ءال-اۋقاتتى ساقتاۋ ماسەلەلەرىندە ناتيجەلى ىنتىماقتاستىق ءۇشىن مۇمكىندىكتەردىڭ بار ەكەندىگىن راستادىق». «مۋزەي ءتۇنى – 2023» جوباسى اياسىنداعى ءىس-شارالار باعدارلاماسىنا كورمەنىڭ اشىلۋى، ەكسكۋرسيالار، كۆەستتەر، شەبەرلىك ساعاتتار، بالالار مەن ەرەسەكتەرگە ارنالعان ءىس-شارالار، دەرەكتى فيلمدەر كورسەتىلىمى، اۆتورلىق بۇيىمدار جارمەڭكەسى كىرەدى.