الماتى مەكتەپتەرىنىڭ بىرىندە بىرنەشە كۇن بۇرىن وقۋشى قىزدىڭ سىنىپ جەتەكشىسىنە قاتىستى شاعىم ايتىلعان ۆيدەو تارادى.
ول جەردە 9-سىنىپ وقۋشىسى ءوزىنىڭ سىنىپ جەتەكشىسىن «وتە قاتىگەز اپاي» دەپ سيپاتتاعان. ايتۋىنشا، ءمۇعالىم وعان قول كوتەرىپ، جۇلقىلاعان. داۋىس كوتەرىپ، كوڭىلگە كەلەتىن سوزدەر ايتقان.
وسى ماسلەگە بايلانىستى بۇگىن قالاداعى №133 مەكتەپ-گيمنازياسىندا كامەلەت جاسقا تولماعانداردىڭ قۇقىعىن قورعاۋ جونىندەگى ۆەدومستۆوارالىق كوميسسيا وتىرىسى ءوتتى. بۇل جاعدايدىڭ جاي-جاپسارىن اتالعان مەكتەپتىڭ ديرەكتورى سابىركۇل ورازبەكوۆاعا حابارلاسىپ بىلدىك. ديرەكتوردىڭ سوزىنشە، وقۋشىعا قول كوتەردى دەپ جالا جابىلعان مۇعالىمگە قاتاڭ سوگىس بەرىلىپ، ول سىنىپ جەتەكشىلىگى مەن ءوزىنىڭ قاراماعىندا بولعان 9-سىنىپقا ساباق بەرۋدەن شەتتەتىلگەن. ءبىراق مەكەمە باسشىسى ءالى دە سول بۇعان دەيىن ايتىلعان ۋاجىندە، ءمۇعالىم تاراپىنان بالاعا قول كوتەرۋ بولماعان دەيدى.
«ءمۇعالىم وقۋشىعا قاتتىراق داۋىس كوتەرگەن شىعار. ءبىراق، بالاعاتتاماعان، ەشكىمدى ۇرماعان. وسى كەزگە دەيىن بۇل مۇعالىمگە قاتىستى ەشقانداي شاعىم بولعان ەمەس. جۇمىسىنا جاۋاپتى، ءوز ىسىنە ادال مامان»، - دەيدى №133 مەكتەپ-گيمنازياسىنىڭ ديرەكتورى سابىركۇل ورازبەكوۆا.
دەگەنمەن سىڭار ەگىزدىڭ اناسى اقمارال يبادۋللايەۆا ءمۇعالىمنىڭ قىزىنا قول كوتەرىپ، جۇلقىلاعانىن ايتۋدا. سالدارىنان وقۋشى يىعىنان جاراقات الىپتى.
«بۇل ءبىرىنشى جىل ەمەس. مەنىڭ تالابىم - سىنىپ جەتەكشىمىزدى مۇعالىمدىك قابىلەتىنەن ايىرۋ كەرەك. بۇل مەكتەپتە جۇمىس ىستەگەنىن قالامايمىن. مەنىڭ قىزىم 9 مايدان بەرى ساباققا كەلمەيدى. پسيحيكاسىن ءبارىن قۇرتقان، نيەۆرولوگيچەسكيي ۋجە اۋرۋ. قىزىما قاتتى زاقىم تيگەن، ۋشيبتەر بار. قىزىمدى بۇكىل اتا-انا مەن وقۋشىلاردىڭ اراسىندا سىنىپ جەتەكشىسى قارسى قويىپ وتىر»، - دەيدى اتا-انا اقمارال يمادۋللايەۆا.
شىن مانىسىندە 9-سىنىپتىڭ باسقا اتا-انالارى ءمۇعالىمدى قورعاشتاپ، ونى جاقتاپ وتىر.
«مۇعالىمدەر تاراپىنان، مەكتەپ تاراپىنان قاراۋسىز قالىپ، ەشقانداي جۇمىستار جۇرگىزىلمەي، بالالار اراسىندا وسىنداي نارسەلەر ورىن الدى دەگەنمەن كەلىسە المايمىن. بالالى ءۇيدىڭ ۇرلىعى جاتپايدى دەيدى. ەگەر وسىنداي جاعداي بولسا، تەك قانا بايان عانا جانۇياسىنا ايتىپ بارىپ، باسقا بالالار ايتپاي قالۋ مۇمكىن ەمەس قوي»، - دەيدى اتا-انا ءلايلا ەسالييەۆا.
«سىنىپتا كەدەرگى جاساپ، ءوزىنىڭ ساباق وقىپ وتىرعان سىنىپتاستارىنا كوپ مينۋس جاعداي جاسايدى ەكەن. ءوزى باستايدى. مۇعالىمدەرگە ءسوز قايتارادى. ساباقتا نەشە ءتۇرلى سوزدەر ايتىپ وتىرادى. الەۋمەتتىك جەلىگە شىعىپ تۇرعان ۆيدەولارىنداعى ۇرۋ، ۇرسۋ، سىنىپتا وسىلاي جاساۋ دەگەن، مەنىڭ قىزىم اشىق «ماما، ونداي بولمايدى» دەيدى. ايتقانى جالعان»، - دەيدى اتا-انا جازيرا بايمۇقان.
ءقازىر سىنىپ جەتەكشىلىگىنەن شەتتەتىلگەن ءمۇعالىم 15 جىلدان بەرى قازاق ءتىلى مەن ادەبيەتى پانىنەن ساباق بەرىپ كەلەدى.
№133 مەكتەپ ديرەكتورى سابىركۇل ورازبەكوۆا بالا قۇقىعى ءبىرىنشى ورىندا ەكەنىن ايتۋدا. ءقازىر وسى جاعدايعا بايلانىستى بالالارمەن دە، مۇعالىممەن دە پسيحولوگ، نيەۆروپاتولوگ ماماندار جۇمىس ىستەپ جاتىر.
وسى جاعدايعا بايلانىستى باسقا دا اتا-انالاردىڭ ويىن سۇراپ كوردىك. اركىم ماسەلەنى تەك ءبىرجاقتى قاراپ، ءبىرجاقتى شەشىم قابىلداعان دۇرىس ەمەس دەيدى. وقۋشى - ءمۇعالىم - مەكتەپ - اتا-انالار اراسىندا وسىنداي داۋ-داماي سوڭعى ۋاقىتتا جيىلەپ كەتكەنى راس.
- ءقازىر ءوزى بالا كىشى بولسىن، ۇلكەن بولسىن، بالاعا قاراپ ءسوز ايتا المايتىن بولدىق. پسيحولوگتاردىڭ ءسوزىن تىڭداساق، بالانىڭ بەتىن قاعۋعا بولمايدى. ۇرسۋعا بولمايدى. قول كوتەرۋدى بىلاي قويعاندا. بالانىڭ بەتىن قاقپاسا، ەسكەرتۋ جاساماسا وعان قالاي باعىت-باعدار بەرەمىز سوندا؟!
- قانداي جاعداي بولماسىن ءمۇعالىم ۇستامدىلىق تانىتىپ، قاتتى اشۋ شاقىرماعانى دۇرىس. ءوزىنىڭ اشۋىن باسا الماسا، ول قالاي ءمۇعالىم بولىپ ءجۇر. بالانىڭ ءتىلىن تابۋ كەرەك.
- جاعدايعا قاراي، بالا كىنالى بولسا، ەسكەرتۋ جاساپ، قاتتىراق ايتقاندا تۇرعان ەشتەڭە جوق دەپ ويلايمىن. ءتىپتى تىڭداماسا، اتا-اناسىنا ايتۋ كەرەك. ءبىراق قول كوتەرىپ، جۇلقىپ-سىلكىلەۋ دۇرىس ەمەس.
ءبىرجاقتى پىكىر بولماسىن دەپ وزگە مەكتەپ ۇستازدارىنان دا وسىنداي جايتتارعا قاتىستى ويلارىن سۇراستىرىپ كوردىك.
«ءقازىر اتا-انالاردىڭ كوبى مۇعالىمگە قاراعاندا بالاسىنىڭ سوزىنە سەنەدى جانە سونىڭ ءسوزىن سويلەيدى. كەيدە داۋىس كوتەرىپ سويلەيتىن ساتتەر بولادى. سەبەبى كەيبىر بالالارعا قاتتىراق ايتپاساڭ، ايتقانىڭدى ورىنداي قويمايدى. ۇستازدار بالالاردىڭ جانىن جارالايتىن ءسوز ايتىپ، قول كوتەرەتىن ارەككەتكە بارادى دەپ ايتا المايمىن. كەرىسىنشە، قانداي جاعداي بولماسىن بالانىڭ جانىن تۇسىنۋگە، قولداۋ كورسەتۋگە تىرىسادى»، - دەيدى جانار ەسىمدى قازاق ءتىلى ءمۇعالىمى
«ءقازىر شاماسى جەتكەن ادامنىڭ ءبارى ءمۇعالىمدى ايىپتاپ شىعاتىن بولدى. ۇيلەرىندە بەتىن قاقپاي وسىرگەن بالالارىنا ەشقانداي ەسكەرتۋ جاساپ، تۇزەتە المايتىنداي بولدىق. كەرەك كەزىندە ءمۇعالىمنىڭ قاتالدىق تانىتۋى كەرەك. وسىنى كوبى، اسىرەسە بالالار شەكتەن تىس قاتتىلىقپەن شاتاستىرادى. قاتتىراق سويلەۋ ارقىلى بالانى شيراتىپ العىسى كەلەتىن بولۋى كەرەك»، - دەيدى نۇرگۇل ەسىمدى كوپجىلدىق تاجىريبەسى بار ءمۇعالىم.