قازاقستاندا 6 ماۋسىم - قۇربان ايت كۇنى بولىپ بەكىتىلدى. بۇل كۇنى بارشا مۇسىلمان جاراتۋشىنىڭ رازىلىعى ءۇشىن قۇربان شالىپ، مۇقتاج جاندارعا ۇلەستىرەدى. قازاقستان مۇسىلماندارى ءدىني باسقارماسى ونلاين قۇربان شالۋ مۇمكىندىگىن بيىل دا ۇسىنىپ وتىر. قاسيەتتى كۇن الدىندا نەنى ءبىلۋ كەرەك؟ اqshamnews.kz ماتەريالىنان ءبىلىڭىز.
ونلاين قۇربان شالۋدىڭ شاريعاتتاعى ۇكىمى قانداي؟
قازاقستاندا بيىل دا قۇربان ايت كەزىندە قۇربان شالۋعا ونلاين تاپسىرىس بەرۋ مۇمكىندىگى بار. بۇل تۋرالى قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ارنايى باسپا ءسوز ءماسليحاتىندا مالىمدەدى.
"بيىل دا ەلىمىزدە قۇربان شالۋ ونلاين جانە وففلاين فورماتتا وتەدى. ءدىني باسقارما حالىققا قولايلى جاعداي جاساۋ ماقساتىندا قۇربان شالۋ ءراسىمىن قاشىقتان وتكىزۋگە ارنالعان qurban.muftyat.kz سايتىن ىسكە قوستى. دىنىمىزدە قۇرباندىق شالۋ ءراسىمىن باسقا بىرەۋگە تاپسىرىپ، ونى وكىل ەتە الادى. ەگەر ءوزى بارا الماسا، ءبىر كىسىگە ءوتىنىش جاساپ، قۇربان شالۋعا رۇقسات ەتىلگەن. دەمەك، ونلاين فورماتتا قۇربان شالۋعا تاپسىرىس بەرە الاسىزدار"، – دەدى باس ءمۇفتي.
قازاقستاندا ونلاين قۇربان شالۋ تاجىريبەسى COVID-19 پاندەمياسى كەزىندە ەنگىزىلدى. 2020 جىلى قازاقستان مۇسىلماندارى ءدىني باسقارماسى (قمدب) qurban2020.kz سايتىن ىسكە قوسىپ، مۇسىلمان قاۋىمىنا قاشىقتان قۇربان شالۋعا مۇمكىندىك بەردى. بۇل جوبا تۇركيا، مالايزيا، يندونەزيا، بىرىككەن اراب امىرلىكتەرى سياقتى مۇسىلمان ەلدەرىنىڭ تاجىريبەسىنە سۇيەنىپ جۇزەگە اسىرىلدى .
قالاي تاپسىرىس بەرۋگە بولادى؟
ونلاين قۇربان شالۋ ءۇشىن ازاماتتارعا ارنايى qurban.muftyat.kz سايتى اشىلعان. سايتتان قاراجاتىڭىزعا قاراي ۇساق نەمەسە ءىرى قارا مال تاڭداپ، بانك ارقىلى تولەم جاساساڭىز جەتكىلىكتى. قوي مەن ەشكى — جەكە ادامعا، ال سيىر مەن تۇيەنى — ءبىر ادام نەمەسە جەتى ادامنىڭ بىرىگۋىمەن شالۋعا رۇقسات.
تاپسىرىس ءساتتى راسىمدەلگەن سوڭ تاپسىرىس بەرۋشىگە SMS حابارلاما جىبەرىلەدى. قۇربان شالىنعان سوڭ فوتو جانە بەينەەسەپ ۇيالى تەلەفون نومىرىنە جولدانادى. قۇرباندىق ەتى تۇگەلدەي مۇقتاج جاندارعا جەتكىزىلەدى.
بىلتىر 1800 ونلاين قۇرباندىق تاپسىرىسى تىركەلگەن
2024 جىلى قۇربان ايتتىڭ العاشقى كۇنى قازاقستان بويىنشا 20 مىڭنان استام مال قۇرباندىققا شالىنعان. ونىڭ ىشىندە:
-
قوي – 17 000
-
ەشكى – 1600
-
ءىرى قارا – 1300
-
تۇيە – 5
بۇل قۇرباندىقتاردىڭ 10 پايىزى ونلاين تۇردە، ياعني شامامەن 1800 تاپسىرىس قاشىقتان جۇزەگە استى. قمدب-نىڭ مالىمەتىنشە، بىلتىرعى قۇرباندىق ەتى 62 مىڭ وتباسىعا جانە 136 مەكەمەگە ۇلەستىرىلگەن.
"مەن 10 جىلدان بەرى الماتىدا تۇرامىن. جىل سايىن قۇرباندىق شالاتىن كەزدە اۋىلىمىزعا بارىپ، مال تاڭداپ، ونى سويىپ، ۇلەستىرەتىنبىز. پاندەميا كەزىندە بۇل مۇمكىندىكتەن قاعىلدىق. سول جىلى ءمۇفتيات ونلاين قۇربان شالۋ مۇمكىندىگىن ۇسىندى. سول ۋاقىتتان بەرى وسىلاي جىل سايىن ونلاين قۇربان شالۋدى پايدالانىپ كەلەمىز. شاريعات رۇقسات بەرىپ تۇرعاندىقتان بۇل قاراستىرىلعان مۇمكىندىك وتە قولايلى دەر ەدىم. اسىرەسە ءبىز سەكىلدى جۇمىسباستى، قالانىڭ ادامدارىنا وتە ىڭعايلى" دەيدى الماتى تۇرعىنى ارۋجان ۋستەميروۆا.
بيىل مال باعاسى قانشادان بولىپ جاتىر؟
بيىل مال باعاسى بىلتىرعىمەن سالىستىرعاندا 5-10 مىڭ تەڭگە قىمباتتاعان. ماسەلەن مaltabu.kz سايتىندا ساتىلىپ جاتقان مال باعالارى ازىرگە مىناداي:
-
قوي — 60 000 – 90 000 تەڭگە
-
سيىر — 420 000 – 700 000 تەڭگە
-
تۇيە — 750 000-نان جوعارى
قۇرباندىققا مال ىزدەگەن جاندار ءۇشىن سايتتا ناقتى وڭىرلىك باعالار مەن وپسيالار كورسەتىلگەن.