ۇكىمەت وتىرىسىندا وتاندىق وندىرۋشىلەردى قولداۋ شارالارى تالقىلاندى.
اتاپ ايتقاندا، 2025 جىلدىڭ 1 قاڭتارىنان باستاپ كۇشىنە ەنگەن مەملەكەتتىك ساتىپ الۋ تۋرالى زاڭنىڭ العاشقى ناتيجەلەرىنە ەرەكشە نازار اۋدارىلدى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
قارجى ۆيسە-مينيسترى داۋرەن كەڭبەيلدىڭ ايتۋىنشا، بيىلعى 5 ايدا مەملەكەتتىك كەلىسىمشارتتاردىڭ رەكوردتىق كولەمى بايقالدى – جالپى سوماسى 5 ترلن تەڭگەگە 845 مىڭ كەلىسىمشارت جاسالعان. بىلتىرعى كەزەڭدە 2،4 ترلن تەڭگەگە 660 مىڭ كەلىسىمشارت تىركەلگەن-دى، ياعني ءوسىم ايتارلىقتاي تۇردە ارتقان.
«مەملەكەتتىك ساتىپ الۋ تۋرالى» زاڭعا سايكەس ۇلتتىق رەجىمنەن الىپ قويۋ تىزبەسى ەداۋىر كەڭەيتىلىپ، بۇل شەتەلدىك وندىرۋشىلەرگە مەملەكەتتىك ساتىپالىمنىڭ بەلگىلى ءبىر ساناتتارىنا قاتىسۋىن شەكتەدى. اتالعان تەتىكتى قولدانۋ ونىڭ تيىمدىلىگىن كورسەتتى. نەگە دەسەڭىز، بۇل امال وتاندىق تاۋارلاردىڭ ساتىپالىم سالاسىنداعى ۇلەسىن ارتتىرۋعا سەپتىگىن تيگىزىپ، جەرگىلىكتى ءوندىرىستى دامىتۋعا جول اشادى.
زاڭدا قارجى مينيسترلىگى بەكىتكەن ءتىزىم مەن كولەمگە جانە قاعيدالارعا سايكەس شاعىن جانە ورتا بيزنەس سۋبەكتىلەرىنەن ساتىپ الۋدىڭ باسىمدىققا يە ءتارتىبى قاراستىرىلعان. بۇل شەشىم شوب سۋبەكتىلەرىنىڭ مەملەكەتتىك ساتىپالىمعا قاتىسۋىن كۇشەيتۋگە، سونداي-اق وتاندىق شاعىن جانە ورتا بۋىن كاسىپورىندارىن تۇراقتى تاپسىرىس پەن ولاردىڭ ورنىقتى ءوسىمىن قامتاماسىز ەتۋگە باعىتتالعان. وسى ارقىلى ەلىمىزدە كاسىپكەرلىك پەن جۇمىسپەن قامتۋ ءىسىن دامىتۋعا قوسىمشا جاعدايلار جاسالىپ وتىر.
بۇدان باسقا وفتەيك-كەلىسىمشارتتاردى ءبىر كوزدەن الۋ تاسىلىمەن جاساسۋ پراكتيكاسى جوسپارلى تۇردە ەنگىزىلىپ جاتىر. وسى ءتاسىل اسىرەسە ءونىمدى ساتۋدىڭ ۇزاقمەرزىمدى كەپىلدىكتەرىن قاجەت ەتەتىن كاسىپورىندار ءۇشىن وتە ماڭىزدى.
ءقازىر ىسكە اسىرىلعان جۇمىسپەن قاتار وتاندىق تاۋار وندىرۋشىلەردى قولداۋ شارالارى جالعاسىپ كەلەدى. مەملەكەتتىك ساتىپ الۋ ەرەجەلەرىنە ءبىرقاتار جاڭا تۇزەتۋ ەنگىزىلمەك. ولار كەلىسۋدىڭ سوڭعى ساتىسىندا تۇر جانە جاقىن ارادا قابىلداناتىن بولادى. نەگىزگى وزگەرىستەردىڭ قاتارىندا وتاندىق تاۋار وندىرۋشىلەر ءۇشىن اۆانستى 30 پايىزدان 50 پايىزعا دەيىن ۇلعايتۋ، جەتكىزۋ مەرزىمىن 15 كۇننەن 60 كۇنتىزبەلىك كۇنگە دەيىن ارتتىرۋ، سونداي-اق تولەم مەرزىمىن 30 كۇنتىزبەلىك كۇننەن 10 جۇمىس كۇنىنە دەيىن ازايتۋ سىندى جاڭاشىلدىقتار بار. اتالعان رەفورما قىزمەت كورسەتۋشىلەردىڭ وتىمدىلىگى مەن قارجىلىق تۇراقتىلىعىن ارتتىرۋعا مۇمكىندىك بەرەدى.
قوسىمشا وتاندىق تاۋار وندىرۋشىلەر ءۇشىن 3 پايىز مولشەرىندە شارتتى جەڭىلدىكتى ەنگىزۋ، سونداي-اق قازاقستاندىق تاۋار وندىرۋشىلەر تىزىمىنە قوسۋ پروسەسىن اۆتوماتتاندىرۋ قاراستىرىلىپ وتىر.
وسى شارالار اكىمشىلىك جۇكتەمەنى ازايتۋعا، راسىمدەردى جەدەلدەتىپ، وتاندىق بيزنەس ءۇشىن ساتىپالىم جۇيەسىنىڭ قولجەتىمدىلىگىن ارتتىرۋعا باعىتتالعان.
«سىبايلاس جەمقورلىقتىڭ سىن-قاتەرىنە جول بەرمەۋ ءۇشىن وندىرۋشىلەردى وتاندىق تاۋار وندىرۋشىلەر تىزىمىنە ەنگىزۋدىڭ تولىق اۆتوماتتاندىرىلعان پروسەسى ىسكە اسىرىلدى. ءتىزىمدى ونەركاسىپ ماقساتىندا پايدالانۋعا ەنگىزۋ بيىلعى ءتورتىنشى توقسانعا جوسپارلانعان. تۇتاستاي العاندا، مەملەكەتتىك ساتىپالىم جۇيەسىندە وتاندىق وندىرۋشىلەردى قولداۋ ءارى تاۋار وندىرۋشىلەر ءتىزىمىن اۆتوماتتاندىرۋ بويىنشا جۇمىستار جالعاساتىن بولادى»، - دەدى داۋرەن مارات ۇلى.
جاڭا زاڭ قازاقستاننىڭ وندىرۋشىلەرى مەن كاسىپكەرلەرگە ساتىپالىم پروسەستەرىنە قاتىسۋ مۇمكىندىگىن ايتارلىقتاي كەڭەيتىپ، قاجەتتى راسىمدەردىڭ اشىقتىعىن قامتاماسىز ەتۋ مەن بيۋدجەت قاراجاتىن ءتيىمدى جۇمساۋعا وڭ اسەر ەتەدى.
سيفرلاندىرۋ مەن ىنتالاندىرۋ امالدارىن ەنگىزۋ ارقىلى مەملەكەتتىك ساتىپالىم پروسەسى جەرگىلىكتى بيزنەستى جولعا قويىپ، جۇمىسپەن قامتۋ مەن رەسپۋبليكاداعى ونەركاسىپ الەۋەتىن دامىتۋدىڭ پارمەندى قۇرالىنا اينالدى.