قاشاعاندى دامىتۋدا ۇكىمەت كەن يگەرۋشىلەرمەن سىندارلى ديالوگكە دايىن

ق ر پرەمەر-مينيسترى ءاليحان سمايىلوۆ پەن North Caspian Operating Company N.V. باسقارۋشى ديرەكتورى وليۆە لازار، سونداي-اق سولتۇستىك كاسپيي جوباسىنا قاتىسۋشى كومپانيالاردىڭ باسشىلارى قاشاعان مۇناي-گاز كەن ورنىن يگەرۋدىڭ وزەكتى ماسەلەلەرىن تالقىلادى، دەپ حابارلايدى Almaty-akshamy.kz.

كەڭەسكە قاتىسۋشىلار قازاقستاننىڭ ەكولوگيالىق زاڭناماسىنىڭ نورمالارىن ساقتاۋ، اعىمداعى ءوندىرىستىڭ تۇراقتىلىعىن قامتاماسىز ەتۋ، قاشاعان كەن ورنىنىڭ بولاشاق كەڭەيتۋ جوبالارىن ىسكە اسىرۋ جانە ءوندىرىس دەڭگەيىن ۇلعايتۋ جونىندەگى شارالار، سونداي-اق جاڭا ينۆەستيسيالىق جوبالاردى ىسكە اسىرۋ، اتاپ ايتقاندا، گاز وڭدەۋ زاۋىتتارىن سالۋ ماسەلەلەرىن تالقىلادى.

پرەمەر-مينيستر كونسورسيۋم كومپانيالارى قازاقستاندا جۇمىس ىستەگەن جىلدارى كوپتەگەن ەكونوميكالىق جانە الەۋمەتتىك مىندەتتى شەشۋگە قاتىسىپ، ءتيىمدى سەرىكتەستەر رەتىندە تانىلعانىن اتاپ ءوتتى.

«ۇكىمەت قاشاعان كەن ورنىنىڭ تۇراقتى جۇمىسىنا جانە ودان ءارى يگەرىلۋىنە ەرەكشە نازار اۋدارادى. بۇل – ستراتەگيالىق اكتيۆ، سوندىقتان قاشاعان كەن ورنىنىڭ بولاشاق دامۋ جوبالارىن ۋاقىتىلى ىسكە اسىرۋ ءبىز ءۇشىن ماڭىزدى»، — دەدى ءاليحان سمايىلوۆ.

كەزدەسۋ قورىتىندىسى بويىنشا تاراپتار بىرلەسىپ جۇمىس ىستەۋ جانە كوزدەلگەن جوسپارلارعا قول جەتكىزۋ اياسىندا سىندارلى ديالوگقا دايىن ەكەندەرىن راستادى.