قازاقستاندا تۋريستىك ينفراقۇرىلىمدى دامىتۋ باعىتىندا جۇمىس جالعاسۋدا. قازىرگى ۋاقىتتا 83 ينفراقۇرىلىمدىق جوبا ىسكە اسىرىلىپ جاتىر.
ولاردىڭ بارلىعىندا جوبالىق-سمەتالىق قۇجاتتاما بار، دەپ حابارلايدى Almaty-akshamy.kz.
سونىمەن قاتار، تابيعاتتى قورعاۋ اۋماقتارىن قامتيتىن جوبالار، اتاپ ايتقاندا – يمانتاۋ-شالقار كۋرورتتى ايماعىندا اۆتوجولدار سالۋ جانە رەكونسترۋكسيالاۋ، سونداي-اق جاسىباي كولىنە دەيىنگى ۇزىندىعى 15 كم كىرمە جولدى ورتاشا جوندەۋ. جاعاجاي دەمالىسىنىڭ تانىمالدىعىنىڭ ارتۋىن ەسكەرە وتىرىپ، ماڭىزدى جوبالاردىڭ ءبىرى - اباي وبلىسىنداعى الاكول كولىنىڭ جاعالاۋىن نىعايتۋ جۇمىستارى جانە بالقاش قالاسىنداعى بەرتىس شىعاناعىنىڭ جاعالاۋىن اباتتاندىرۋ. ءتيىستى قارجىلاندىرۋ بولعان جاعدايدا، بۇل جوبالاردى ىسكە اسىرۋ جاقىن ارادا جوسپارلانىپ وتىر.
«جۇرگىزىلىپ جاتقان جۇمىستار ەلدىڭ ينۆەستيسيالىق تارتىمدىلىعىن ارتتىرۋعا جانە تۋريستىك ينفراقۇرىلىمدى جاقسارتۋعا ارنالعان. ەلدى مەكەندەردەن تىس جەرلەردە جانە ۇلتتىق پاركتەر اۋماعىندا ينفراقۇرىلىمدى دامىتۋدىڭ ءتۇيىندى ماسەلەلەرىن شەشۋ ماقساتىندا اكىمدىكتەرگە ءتيىستى قۇزىرەت بەرۋ بويىنشا جۇمىستار جۇرگىزىلۋدە»،-دەدى مادەنيەت جانە سپورت ۆيسە-مينيسترى ەرجان ەركىنبايەۆ.
وتكەن جىلى 28 جوبا اياقتالدى. ولاردىڭ ىشىندە بالقاش كۋرورتتى ايماعىندا ينجەنەرلىك كوممۋنيكاسيا سالۋ جانە اقتاۋ قالاسىنىڭ جىلى جاعاجايىنا دەيىن اۆتوموبيل جولىن سالۋ اسا ماڭىزدى. ءۇشارال مەن ءۇرجارداعى اۋەجايلاردىڭ ىسكە قوسىلۋى ايتۋلى وقيعا بولدى، ول ەلىمىزدىڭ اۋە تاسىمالى مۇمكىندىكتەرىن كەڭەيتتى.