قۇرىلىستىڭ باستالۋىنا اتىراۋ وبلىسىنا جۇمىس ساپارىمەن بارعان اسقار مامين قاتىستى.
ق ر پرەمەر-مينيسترى اسقار مامين مۇناي-گاز حيمياسى جانە مۇناي-گاز ماشيناسىن جاساۋ سالالارىنداعى ءىرى ينۆەستيسيالىق جوبالاردىڭ ىسكە اسىرىلۋ بارىسىن تەكسەردى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
ۇكىمەت باسشىسى قاشاعان كەن ورنىندا گازدى كەشەندى دايىنداۋ قوندىرعىسى – گاز وڭدەۋ زاۋىتىنىڭ قۇرىلىسىن باستاپ بەردى. كاسىپورىننىڭ وڭدەۋ قۋاتى جىلىنا 1 ملرد م³ دەيىن شيكى كۇكىرتتى گازدى قۇرايدى، ودان 815 ملن م³ تاۋارلىق گاز جانە 119 مىڭ توننا سۇيىتىلعان گاز، 212 مىڭ توننا كۇكىرت جانە 35 مىڭ توننا گاز كوندەنساتى وندىرىلەتىن بولادى. ونى 2023 جىلعى ءتورتىنشى توقساندا پايدالانۋعا بەرۋ كوزدەلگەن.
جوبا ەلىمىزدىڭ گاز وڭدەۋ سالاسىن دامىتۋعا سەرپىن بەرەدى. قاشاعاندا مۇناي ءوندىرۋ دەڭگەيىن تاۋلىگىنە 450 مىڭ باررەلگە دەيىن ۇلعايتۋعا، ەلدى ودان ءارى گازداندىرۋ ءۇشىن رەسۋرستىق بازانى كەڭەيتۋگە جانە مۇناي-گاز ءوندىرىسىنىڭ ەكولوگيالىعىن ارتتىرۋعا مۇمكىندىك بەرەدى. قۇرىلىس كەزەڭىندە مۇندا 2500-گە دەيىن ۋاقىتشا، ال پايدالانۋ كەزەڭىندە 600 تۇراقتى جۇمىس ورنى قۇرىلادى.
پرەمەر-مينيستر جىلىنا 500 مىڭ توننا پوليپروپيلەن وندىرەتىن قازاقستانداعى العاشقى ينتەگراسيالانعان گاز-حيميا كەشەنىنىڭ قۇرىلىس بارىسىن تەكسەردى. جوبانى «قازاقستان پەتروكەميكال ينداستريز (KPI)» ج ش س جۇزەگە اسىرادى. ينۆەستيسيالاردىڭ جالپى كولەمى $2،6 ملرد قۇرايدى. ونى 2022 جىلعى ناۋرىز ايىندا پايدالانۋعا بەرۋ جوسپارلانعان. كاسىپورىندا 630-دان استام تۇراقتى جۇمىس ورنى اشىلادى.
قازىرگى ۋاقىتتا جوبا كەستەسى بويىنشا جالپى پروگرەسس 87،19%-دى قۇرايدى. قۇرىلىسقا 39 قوسالقى مەردىگەر كومپانيا تارتىلعان، ونىڭ 36-سى — قازاقستاندىق. ۇكىمەت باسشىسى بيىل ءساۋىر ايىندا پوليپروپيلەن وندىرەتىن ينتەگراسيالانعان گاز-حيميا كەشەنىنىڭ جۇمىسىن قامتاماسىز ەتۋ ءۇشىن ازوت جانە سىعىلعان قۇرعاق اۋا شىعاراتىن قوندىرعىسىنىڭ قۇرىلىسىن اياقتاعان «ەر ليكيد قاراباتان تەح گازى» قازاقستان-فرانسۋز بىرلەسكەن كاسىپورنىنا باردى. زاۋىتتىڭ قۋاتتىلىعى 8 مىڭ نم3/س ازوت جانە 8،1 مىڭ نم3/س سىعىلعان قۇرعاق اۋانى قۇرايدى.
اسقار مامين 2020 جىلعى تامىزدا پايدالانۋعا بەرىلگەن قۋاتى جىلىنا 36 مىڭ م² گرەيتينگ جانە 60 مىڭ توننا مىرىشتاۋدى قۇرايتىن «اتىراۋمۇنايماش» ج ش س گرەيتينگ جانە ىستىقتاي مىرىشتاۋ سەحىنىڭ جۇمىسىمەن تانىستى. «كاسپيي مۇناي» ج ش س ارالاۋ بارىسىندا پرەمەر-مينيسترگە اتىراۋ وبلىسىنىڭ جىلىوي اۋدانىنداعى «ايرانكول» كەن ورنىن 2019-2021 جىلدارى جۇرگىزىلگەن سيفرلاندىرۋدىڭ ناتيجەلەرى تانىستىرىلدى – مۇناي ءوندىرۋ 10%-عا ارتتى، شىعىندار 30%-عا ازايدى، وپەراسيالىق قىزمەت 80%-عا جەتىلدىرىلدى، مۇناي قالدىقتارىنىڭ كولەمى قىسقارتىلدى، پاندەميا كەزەڭىندە كەن ورنىن قاشىقتان باقىلاۋ جانە باسقارۋ مۇمكىندىگى ەنگىزىلدى.