الماتىدا كوشەلەردى جاڭعىرتۋدىڭ جاڭا قاعيداتى – «قاسبەتتەن قاسبەتكە دەيىن» ەنگىزىلۋدە. بۇل تۋرالى الماتى اكىمى ەربولات دوسايەۆ 2025–2027 جىلدارعا ارنالعان قالالىق بيۋدجەت تالقىلانىپ جاتقان ءماسليحات سەسسياسىندا مالىمدەدى.
«بۇگىندە الەمنىڭ دامىعان مەگاپوليستەرىندە بارلىق ينفراقۇرىلىمدىق قاباتتى جاڭعىرتۋ ارقىلى كوشەلەردى كەشەندى كورىكتەندىرۋ جۇمىستارى «قاسبەتتەن قاسبەتكە دەيىن» قاعيداتى بويىنشا جۇرگىزىلۋدە. ءبىز الماتىدا العاش رەت وسى حالىقارالىق تاجىريبەنى قولدانا باستادىق»، – دەدى قالا باسشىسى.
اكىمنىڭ ايتۋىنشا، «قاسبەتتەن قاسبەتكە دەيىن» قاعيداتى بويىنشا قازىرگى ۋاقىتتا دوستىق داڭعىلىنىڭ ءال-فارابي داڭعىلىنان قۇرمانعازى كوشەسىنە دەيىنگى جانە پۋشكين كوشەسىنىڭ گوگول كوشەسىنەن رايىمبەك داڭعىلىنا دەيىنگى بولىگىن جاڭعىرتۋ جوبالارى اياقتالدى. قۇرىلىس جۇمىستارى 2025 جىلدىڭ ناۋرىز ايىندا باستالادى. بۇل ماقساتقا 3،7 ملرد تەڭگە قاراستىرىلعان.
2025 جىلى رادوستوۆەس، ماقاتايەۆ، اۋەزوۆ، گوگول، جاندوسوۆ، روزىباكييەۆ جانە ساتبايەۆ سىندى تاعى 7 كوشەنى جوبالاۋ اياقتالادى.
«الماتىباسجوسپار» عزي ءجشس-نىڭ مالىمەتىنشە، جوبالىق جۇمىستار اياسىندا قالالىق ينفراقۇرىلىمدى كەشەندى قايتا قۇرۋ كوزدەلگەن: كوشەلەر زاماناۋي جاياۋ جۇرگىنشىلەر جولدارىمەن جابدىقتالىپ، تۇرعىنداردىڭ قاۋىپسىزدىگىن ءارى جايلىلىعىن قامتاماسىز ەتەدى. تروتۋارلاردا جايلى ورىندىقتار، كۇركەلەر، قوقىس جاشىكتەرى جانە جاڭا جارىقتاندىرۋ باعانالارى ورناتىلادى.
بارلىق جۇمىس الماتى تۇرعىندارى مەن قوناقتارى ءۇشىن جايلى، ەكولوگيالىق جانە تارتىمدى ورتا قۇرۋعا باعىتتالعان زاماناۋي كورىكتەندىرۋ ستاندارتتارىن ەسكەرە وتىرىپ جۇرگىزىلەدى.