12 مىڭ الماتىلىق قارجىلىق ساۋاتتىلىق بويىنشا وقۋدان وتۋگە مۇمكىندىك الادى. «قارىزسىز قوعام» جوباسى باستالعاننان بەرى مەگاپوليستىڭ 3500 تۇرعىنى ءوز قارجىسىن باسقارۋدى ۇيرەندى. بۇل اقپاراتتى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا جوبانىڭ باستاماشىلارى ايتتى، دەپ حابارلايدى اlmaty-akshamy.kz.
Amanat پارتياسى ىسكە قوسقان «قارىزسىز قوعام» جوباسى پروبلەمالىق كرەديتتەر مەن قارىزدار سالدارىنان قيىندىقتارعا تاپ بولعان قازاقستاندىقتاردى قولداۋعا باعىتتالعان. الماتىدا جوبا 2024 جىلدىڭ 5 اقپانىنان باستاپ قالالىق اكىمشىلىكپەن بىرلەسىپ جۇزەگە اسىرىلۋدا.
بريفينگتە ءسوز سويلەگەن Amanat پارتياسىنىڭ الماتى قالالىق فيليالى ءتوراعاسىنىڭ ورىنباسارى قۋانىش تولەپوۆ مەملەكەت باسشىسى ءوزىنىڭ قازاقستان حالقىنا جولداۋىندا جوبانىڭ ماڭىزدىلىعىن جانە ونى ەلىمىزدىڭ بارلىق وڭىرلەرىندە كەڭەيتۋ قاجەتتىگىن اتاپ ءوتتى.
بيىل جوبا بويىنشا ەلىمىزدىڭ بارلىق وڭىرىندە 200 مىڭ ادامدى، ونىڭ ىشىندە الماتى قالاسىنىڭ 12 مىڭ تۇرعىنىن وقىتۋ جوسپارلانىپ وتىر. قازىرگى ۋاقىتتا قالا اكىمدىگىمەن بىرلەسە قالامىزدىڭ 6 مەكەن-جايى بويىنشا وقىتۋ وتكىزىلۋدە. الماتى قالاسىنا 6 قارجى ساراپشىسى بەكىتىلگەن. ولار تۇسكە دەيىن جالپى باعدارلاما، تۇستەن كەيىن قاتىسۋشىنىڭ قالاۋى بويىنشا جەكە كەڭەستەر بەرەدى. جوبا قالانىڭ 8 اۋدانىن قامتيدى. وقىتۋ 5 كۇن بولادى. وسى ۋاقىت ىشىندە قاتىسۋشىلار وتباسىلىق بيۋدجەتتى جۇرگىزۋدى، شىعىندارىن باسقارۋدى، نەسيەلىك قارىزداردى مەرزىمىنەن بۇرىن وتەۋ بويىنشا ۇسىنىستار الۋدى، ءتيىمدى شارتتارمەن نەسيە تاڭداۋدى، دەپوزيتتەردىڭ ءارتۇرلى شارتتارىمەن تانىسۋدى، ءىرى ساتىپ الۋلاردى جوسپارلاۋدى ۇيرەنەدى»، - دەدى ق.تولەپوۆ.
جوبا باستالعاننان بەرى قازىرگى ۋاقىتقا دەيىن 11 اعىن وقىتىلىپ، بارلىعى 3500-دەن استام قاتىسۋشى قارجىلىق ساۋاتتىلىق بويىنشا وقىتۋدان ءوتتى.
سونداي-اق وقىتۋ شەڭبەرىندە قارجى ساراپشىلارى جەكە كونسۋلتاسيالار وتكىزەدى جانە قاتىسۋشىلاردىڭ قالاۋى بويىنشا ءوز بيزنەسىن اشۋ ءۇشىن مەملەكەتتىك گرانتتىق جانە كرەديتتىك باعدارلامالارعا بيزنەس-جوسپار جازۋعا كومەكتەسەدى. جوبا اياسىندا قاتىسۋشىلار بىلىكتى زاڭ كومەگىن الىپ، شوتتارىنا تىيىم سالىنعان، قارىزدارى كوللەكتورلىق كومپانياعا ساتىلعان جاعدايدا نەمەسە نەسيەلىك قارىزدى قايتا قۇرىلىمداۋ بويىنشا كومەكتەر الا الادى. بۇل وقۋدان وفلاين فورماتتا ءبىر توپتا 100 ادامعا دەيىن وتۋدە.
«قارىزسىز قوعام» جوباسى قارىزعا بەلشەدەن باتىپ، ءۇمىتىن ۇزگەندەرگە ناقتى قولداۋ كورسەتەدى. جوبا قولدا بار قاراجاتقا ءومىر سۇرۋگە، قاجەتسىز نەسيەدەن باس تارتۋعا ۇيرەتەدى. ءبارىن وسى جوباعا قاتىسىپ، ءوزىنىڭ قارجىلاي ساۋاتتىلىعىن ارتتىرۋعا شاقىرامىن»، - دەدى ق.تولەپوۆ.
وقىتۋ ازاماتتارعا قارجىلىق ماسەلەلەردى جاقسىراق باسقارۋعا جانە اقشالارىن باسقارۋدا نەگىزدەلگەن شەشىمدەر قابىلداۋعا كومەكتەسەدى دەپ كۇتىلۋدە. بۇل ءوز كەزەگىندە قوعامداعى جالپى ەكونوميكالىق تۇراقتىلىقتى جاقسارتۋعا ىقپال ەتەدى.
تەگىن كۋرستار مەن وقۋدان وتۋگە نيەت بىلدىرۋشىلەر تۇرعىلىقتى جەرى بويىنشا Amanat پارتياسىنىڭ اۋداندىق فيليالىنا نەمەسە اۋدان اكىمدىكتەرىنە جۇگىنە الادى. قاتىسۋشىلارعا ىڭعايلى بولۋ ءۇشىن qogamfin.kz ونلاين-پلاتفورماسى دا ىسكە قوسىلدى، ول ارقىلى ءسىز وقۋ كۋرستارىنا جازىلىپ، پايدالى ماتەريالدار مەن بەينە ساباقتاردى جۇكتەپ الۋعا بولادى.