اش قارىنعا سپورتپەن اينالىسۋعا بولا ما دەگەن ساۋال سپورتشىلار مەن تاماقتانۋ جانە فيتنەس ماماندارى اراسىندا ءجيى تالقىلانادى. ناقتى جاۋاپ ءار ادامعا ءارتۇرلى بولۋى مۇمكىن، سەبەبى ول ءسىزدىڭ ماقساتىڭىزعا، جاتتىعۋدىڭ تۇرىنە جانە دەنساۋلىعىڭىزعا بايلانىستى. اqshamnews.kz ءتىلشىسى اش قارىنعا جاتتىعۋدىڭ جاقسى جانە جامان جاقتارىن قاراستىردى.
جاعىمدى جاقتارى
اش قارىنعا جاتتىققاندا اعزا مايدى تەزىرەك ىدىراتا باستايدى. سەبەبى اس قورىتۋعا ەنەرگيا تۇسپەگەندىكتەن، قانداعى قانت ازايادى دا، ورگانيزم قۋاتتى ماي قورىنان الادى.
جەڭىل سەزىنۋ
كەيبىر ادامدار اش قارىنعا جاتتىققاندا وزدەرىن جەڭىل ءارى بەلسەندى سەزىنەدى، ويتكەنى تاماقتان كەيىنگى اسقازانداعى اۋىرلىق مازالامايدى.
اشتىقتىڭ ارتۋى
اش قارىنعا جاسالعان جاتتىعۋدان كەيىن تابەت ارتىپ، ادام تاماقتى جاقسىراق ىشەدى ءارى تاماقتانۋ ءتارتىبىن وڭاي قاداعالاي الادى.
جاعىمسىز تۇستارى
جاتتىعۋ تيىمدىلىگىنىڭ تومەندەۋى. ەنەرگيا قورى جەتكىلىكسىز بولعاندىقتان، اش قارىنعا جاسالعان جاتتىعۋ ونىمدىلىكتى ازايتادى. بۇل اسىرەسە قارقىنى جوعارى جاتتىعۋلاردا قاتتى بايقالادى.
گيپوگليكەميا ءقاۋپى. اش قارىنعا جاتتىعۋ قانداعى قانت دەڭگەيىنىڭ تومەندەۋىنە اكەلۋى مۇمكىن، بۇل السىزدىككە، باس اينالۋعا، ءتىپتى ەسىنەن تانۋعا سەبەپ بولادى.
بۇلشىقەت ماسساسىنىڭ ازايۋى. ەگەر ءسىز ۇنەمى اش قارىنعا جاتتىعا بەرسەڭىز، بۇلشىقەت ماسساسى ازايۋى مۇمكىن.
موتيۆاسيانىڭ تومەندەۋى. كەيبىر ادامدار ەنەرگياسىز ءوزىن ءالسىز سەزىنىپ، جاتتىعۋعا ىنتاسى ازايادى.
ۇسىنىستار
- جاتتىعۋ الدىندا مىندەتتى تۇردە سۋ ءىشۋدى ۇمىتپاڭىز. تاماقتانباساڭىز دا، سۋ جەتكىلىكتى بولماسا، ناتيجەڭىزگە تىكەلەي اسەر ەتەدى.
- اش قارىندا جاتتىعۋدى جوسپارلاساڭىز، قارقىندى ەمەس، جەڭىل نەمەسە ورتاشا جاتتىعۋلاردى تاڭداعان دۇرىس، ال تىم اۋىر كۇشتىك جاتتىعۋلاردان باس تارتىڭىز.
- ءوز جاعدايىڭىزدى ۇنەمى باقىلاپ ءجۇرىڭىز: ەگەر السىزدىك، باس اينالۋ نەمەسە كۇش جەتپەگەنىن بايقاساڭىز، جاتتىعۋدى توقتاتىپ، جەمىس-جيدەك نە يوگۋرت سياقتى جەڭىل اس ىشكەن ءجون.
- جاتتىعۋدان كەيىن اعزانى قالپىنا كەلتىرۋ ءۇشىن اقۋىز بەن كومىرسۋى بار تاعامدارمەن تاماقتانعان ابزال.
- اش قارىندا سپورتپەن اينالىسۋ ءار ادامعا ءارتۇرلى اسەر ەتەدى، سوندىقتان شەشىمدى جەكە ماقساتىڭىزعا، دەنساۋلىعىڭىزعا جانە ادەتىڭىزگە قاراي قابىلداعان دۇرىس. ال ەگەر كۇماندانساڭىز، ماماننىڭ كەڭەسىنە جۇگىنگەن ءجون.