وقۋ-جاتتىعۋعا 15000-نان اسا اسكەري قىزمەتشى قاتىستى
قازاقستاننىڭ قارۋلى كۇشتەرىندە جاۋىنگەرلىك جاتتىعۋعا بارىنشا جاقىنداتىلعان جاعدايدا بولىمشەلەردىڭ دالالىق ماشىعى مەن ۇيلەسىمدىلىگىن جەتىلدىرۋ ماقساتىندا باتالوندىق (ديۆيزيالىق) تاكتيكالىق وقۋ-جاتتىعۋ ءوتتى، دەپ حابارلايدى Almaty-akshamy.kz.
بارلىق اسكەري بولىمدەر مەن قۇرامالاردى تولىق جاۋىنگەرلىك دايارلىققا كەلتىرە وتىرىپ، باتالوندىق (ديۆيزيالىق) تاكتيكالىق وقۋ-جاتتىعۋ وتكىزىلدى. اتالعان وقۋ-جاتتىعۋدىڭ باستى ماقساتى – جەكە قۇرامدى ۇيلەسىمدى ءىس-قيمىل جاساۋعا ماشىقتاۋ، ءبىلىمدى ءىس جۇزىندە بەكىتۋ، داعدىلار مەن ەپتىلىكتى نىعايتۋ. جاۋىنگەرلىك جاعدايعا بارىنشا جاقىنداتىلعان جاتتىعۋ بارىسىندا كومانديرلەر بولىمشەلەردى شەبەر باسقارۋدى جەتىلدىردى.
بولىمدەر مەن قۇرامالاردىڭ جەكە قۇرامى دابىل بويىنشا كوتەرىلىپ، بولىمشەلەردى جاۋىنگەرلىك ازىرلىكتىڭ جوعارى دەڭگەيىنە كەلتىرۋ شارالارى ىسكە اسىرىلدى. تۇراقتى ورنالاسۋ پۋنكتىنىڭ اسكەري قىزمەتشىلەرى وقۋ-جاتتىعۋ پوليگوندارىنا جاۋىنگەرلىك تەحنيكامەن مارش جاساپ، وندا اتىس جانە ارنايى تاكتيكالىق تاپسىرمالاردى ورىندادى.
– وقۋ-جاتتىعۋدا كومانديرلەردىڭ دەربەس شەشىم قابىلداۋىن قاجەت ەتەتىن ءىس-قيمىل، بولىمشەلەر مەن اسكەري بولىمدەردى باسقارۋ بويىنشا كەنەتتەن تۋىندايتىن مىندەتتەردى ورىنداۋدى تالاپ ەتەتىن كۇردەلى، ستاندارتتى ەمەس جاعداي جاسالدى، – دەپ اتاپ ءوتتى باس شتاب جاۋىنگەرلىك دايارلىق دەپارتامەنتى باستىعىنىڭ ورىنباسارى، پولكوۆنيك ۆلاديمير كان.
جاۋىنگەرلىك اتىس جاتتىعۋلارى كەزىندە ۇتىمدى تاكتيكالىق ءىس-قيمىلعا، قارۋ-جاراقتى ۇرىستا شەبەر جانە ءتيىمدى قولدانۋعا جانە بولىمشەلەردىڭ اتىسىن باسقارۋعا، سونداي-اق قاۋىپسىزدىك شارالارىن قاتاڭ ساقتاۋعا باسا نازار اۋدارىلدى. وقۋ-جاتتىعۋ پوليگوندارىندا كۇندىز دە، تۇندە دە قۇرلىقتاعى جانە اۋەدەگى نىساندارعا قارۋدىڭ بارلىق تۇرىنەن اتىس جۇرگىزۋدى كوزدەيتىن جاعداي جاسالدى.
جالپى، بۇل وقۋ-جاتتىعۋعا 15000-نان اسا اسكەري قىزمەتشى قاتىسىپ، 3000-نىڭ ۇستىندە قارۋ-جاراق پەن اسكەري تەحنيكا جۇمىلدىرىلدى.