پاركينسون اۋرۋى ءالى دە ەمدەلمەيدى
11 ساۋىردە بۇكىل الەمدە ءداستۇرلى تۇردە پاركينسون اۋرۋىمەن كۇرەسۋ كۇنى اتاپ وتىلەدى، دەپ حابارلايدى Almaty-akshamy.kz.
بۇل كۇن كەزدەيسوق تاڭدالمادى: 1755 جىلى 11 ساۋىردە دجەيمس پاركينسون دۇنيەگە كەلدى – كەرەمەت اعىلشىن دارىگەرى جانە زەرتتەۋشىسى، ول ءقازىر ونىڭ ەسىمىمەن اتالاتىن اۋرۋدى سيپاتتادى. 1817 جىلى جاريالانعان "دىرىلدەيتىن سال اۋرۋى تۋرالى ەسسە" اتتى عىلىمي ەڭبەگىندە اعىلشىن دارىگەرى التى پاسيەنتتى باقىلاۋ مىسالىندا اۋرۋدىڭ كورىنىستەرىن سيپاتتاپ، نەگىزگى بەلگىلەردى ءبولىپ الىپ، اۋرۋدىڭ دامۋ سەبەپتەرىن تابۋعا تىرىستى.
پاركينسون اۋرۋىمەن كۇرەسۋ كۇنىن دۇنيەجۇزىلىك دەنساۋلىق ساقتاۋ ۇيىمى ادامداردىڭ اۋرۋ تۋرالى حاباردارلىعىن ارتتىرۋ ماقساتىندا باستادى.
سوڭعى جىلدارى وسى سالاداعى نەگىزگى باستامالار حالىقارالىق پاركينسون اۋرۋى جانە قوزعالىس بۇزىلىستارى قوعامى جەتەكشىلىك ەتەتىن پاركينسون اۋرۋى بويىنشا دۇنيەجۇزىلىك ءبىلىم بەرۋ باعدارلاماسى شەڭبەرىندە جۇزەگە اسىرىلۋدا.
باعدارلاماعا قازاقستاننىڭ كوپتەگەن نيەۆرولوگتارى تارتىلعان، بۇل ولارعا وسى سالاداعى بىلىمدەرىن ارتتىرۋعا مۇمكىندىك بەرەدى.
پاركينسون اۋرۋى بۇرىن ەگدە جاستاعى زەينەتكەرلەردىڭ اۋرۋى بولىپ سانالدى، ءبىراق بۇگىندە ول 30-40 جاستاعى ادامداردى دا زاقىمداۋدا. ونىڭ نەگىزگى كورىنىسى - موتور فۋنكسيالارىنىڭ ايقىن بۇزىلۋى، ۇنەمى دىرىلدەۋ جانە بۇلشىقەتتەردىڭ قاتتىلىعى، باعىتتالعان قوزعالىستاردى ورىنداۋ قيىندىقتارى. اۋرۋدىڭ تارالۋى 100 مىڭ حالىققا شاققاندا 120 جاعدايدى قۇرايدى، ال ءقاۋىپ توبىنا نەگىزىنەن 40 جاستان اسقان ادامدار كىرەدى. پاسيەنتتەردىڭ ەڭ جوعارى پايىزى قارتايعان كەزدە بايقالادى.
پاركينسون اۋرۋى نەيروترانسميتتەرلەردىڭ، اتاپ ايتقاندا ءدوپاميننىڭ جەتىسپەۋشىلىگىمەن بايلانىستى. اۋرۋدىڭ نەگىزگى بەلگىلەرى بىرتىندەپ داميدى، اۋرۋ تۇراقتى تۇردە ءورشيدى.
وسىعان بايلانىستى پروفيلاكتيكالىق شارالاردى ساقتاۋ جانە ەرتە دياگنوز قويۋ وتە ماڭىزدى بولادى.
الەمدىك ستاتيستيكاعا سايكەس، قازاقستاندا بۇگىنگى تاڭدا پاركينسون اۋرۋىمەن اۋىراتىن 20 مىڭنان استام ادام بار. قازىرگى ۋاقىتتا ءبىزدىڭ ەلىمىزدە پاسيەنتتەر ءۇشىن وسى پاتولوگيانى ەمدەۋدىڭ بارلىق بەلگىلى زاماناۋي نۇسقالارى، سونىڭ ىشىندە ميدىڭ تەرەڭ نەيروستيمۋلياسياسى جانە پالليدوتوميا جانە تالاموتوميا سياقتى ءابلياتيۆتى ارالاسۋلار ءادىسى بار. جاڭا دياگنوستيكالىق جانە ەمدىك مۇمكىندىكتەردى ەسكەرە وتىرىپ، دياگنوستيكا مەن ەمدەۋدىڭ جاڭا كلينيكالىق حاتتاماسى ازىرلەنۋدە.
وكىنىشكە وراي، پاركينسون اۋرۋى ءالى دە ەمدەلمەيدى، ءبىراق مەديسينا ءبىر ورىندا تۇرمايدى جانە ءقازىر مۇنداي اۋرۋمەن اۋىراتىن پاسيەنتتەردىڭ ءومىر ءسۇرۋ ۇزاقتىعى (دۇرىس ەمدەۋمەن) قاراپايىم ادامداردان ءىس جۇزىندە ەرەكشەلەنبەيدى جانە قولدانىستاعى ەمدەۋ مۇنداي پاسيەنتتەردىڭ ءومىر ءسۇرۋ ساپاسىن ەداۋىر جاقسارتۋعا مۇمكىندىك بەرەدى.