الماتى وبلىسىنىڭ جولدارىندا جاياۋ جۇرگىنشىلەرگە ارنالعان بەس جەرۇستى وتكەلى سالىندى

جاڭا جاساندى قوندىرعىلاردا پاندۋستار جانە ارنايى پلاتفورمالار بار

الماتى وبلىسىندا ورنالاسقان «الماتى-بىشكەك» جانە «الماتى-شەلەك-قورعاس» كۇرە جولدارىندا بەس جاڭا جەرۇستى جاياۋ جۇرگىنشىلەر وتكەلى سالىنىپ، قولدانىسقا بەرىلدى، دەپ حابارلايدى Almaty-akshamy.kz.

«قازاۆتوجول» ۇلتتىق كومپانيانىڭ باسپا ءسوز قىزمەتىنىڭ مالىمەتىنشە، جەرۇستى جاياۋ جۇرگىنشىلەر وتكەلدەرى «الماتى-بىشكەك» تاسجولىنىڭ 23، 24، 28، 45 شاقىرىمدارى جانە «الماتى-شەلەك-قورعاس» كۇرە جولىنىڭ 33 شاقىرىمىندا پايدا بولدى.

جاڭا جەر ءۇستى جاياۋ جۇرگىنشىلەر وتكەلدەرىنىڭ جانىندا قۇمتوعان، المابالىق، قاسىمبەك، بايتەرەك ەلدى مەكەندەرى جانە كەرۋەن اۆتوستانسياسى ورنالاسقان. قۇرىلىس بارىسىندا ەرەكشە قاجەتتىلىگى بار جاندارعا قولايلى جاعداي جاساۋعا باسا كوڭىل بولىنگەن.

«جاڭا جاساندى قوندىرعىلاردا پاندۋستار جانە ارنايى پلاتفورمالار بار. ال جاياۋ جۇرگىنشىلەردىڭ ىڭعايى ءۇشىن باسپالداقتاردىڭ ۇستىندە ارنايى شاتىرلار قاراستىرىلدى. سونىمەن قاتار تۇنگى ۋاقىتتا پايدالانۋشىلاردىڭ قاۋىپسىزدىگىن قامتاماسىز ەتۋ ءۇشىن زاماناۋي جارىقديودتى شامدار ورناتىلدى. جاڭا تيپتەگى جەرۇستى جاياۋ جۇرگىنشىلەر وتكەلدەرىنىڭ قىزمەت ەتۋ مەرزىمى كەمىندە 15 جىل»، - دەپ حابارلادى ۇلتتىق كومپانيادا.