اۋە قورعانىسى كۇشتەرىنىڭ اسكەري بولىمدەرى مەن بولىمشەلەرىندە دە ەسكە الۋ ءىس-شارالارى ءوتتى
بارلىق اسكەري بولىمدەر مەن مەكەمەلەردە اسكەري بورىشىن ورىنداۋ كەزىندە قازا تاپقان اسكەري قىزمەتشىلەردى ەسكە الۋعا ارنالعان ءىس-شارالار ءوتتى، دەپ حابارلايدى Almaty-akshamy.kz.
2022 جىلعى 6 قاڭتاردا الماتى قالالىق اكىمدىگىن بۇزاقىلاردان قورعاۋ كەزىندە 35 گۆارديالىق دەسانتتىق-شابۋىلداۋ قۇراماسى كومانديرىنىڭ ورىنباسارى، پودپولكوۆنيك ساندىبەك حايىروۆ ەرلىكپەن قازا تاپتى. تالدىقورعاندا قىزمەتتىك بورىشىن اتقارۋ كەزىندە اۆياسيالىق بازانىڭ مامانى ەفرەيتور عابدوللا سمايىلقانوۆ قازا بولدى. ساندىبەك حايىروۆتى قارۋلى كۇشتەردىڭ بارلىق اسكەري بولىمدەرى مەن مەكەمەلەرىندە ءبىر مينۋت ۇنسىزدىكپەن ەسكە الدى. پودپولكوۆنيك حايىروۆ قىزمەت ەتكەن قونايەۆ گارنيزونىنىڭ دەسانتتىق-شابۋىلداۋ قۇراماسىندا ميتينگ ءوتتى.
– قارۋلى كۇشتەردە ساندىبەك حايىروۆ ۆزۆود كومانديرىنەن دەسانتتىق-شابۋىلداۋ قۇراماسى كومانديرىنىڭ ورىنباسارىنا دەيىنگى لاۋازىمداردا قىزمەت اتقاردى. ول ناعىز دەسانتشى رەتىندە سوڭعى ساتكە دەيىن اسكەري بورىشىنا ادال بولىپ، اجالعا قاسقايىپ قارسى تۇرا ءبىلدى. جاۋىنگەر دوسىمىز تۋرالى ەستەلىك جۇرەگىمىزدە ماڭگى ساقتالادى، – دەدى دەسانتتىق-شابۋىلداۋ قۇراماسىنىڭ كومانديرى، پولكوۆنيك بەيبىت امانقالييەۆ باتىردىڭ قۇرمەتىنە ۇيىمداستىرىلعان ميتينگىدە.
اۋە قورعانىسى كۇشتەرىنىڭ اسكەري بولىمدەرى مەن بولىمشەلەرىندە دە ەسكە الۋ ءىس-شارالارى ءوتتى.
– قايراتتى، جاس جىگىتتەردىڭ كىسى قولىنان قازا بولۋى قانداي قيىن؟! بۇل ءبىز ءۇشىن ۇلكەن شىعىن. عابدوللا سمايىلقانوۆ سوڭىنا دەيىن ءوزىنىڭ اسكەري بورىشى مەن انتىنا ادال بولدى. ءبىز ونى ءاردايىم ەستە ساقتايمىز، – دەپ اتاپ ءوتتى اۋە قورعانىسى كۇشتەرى باس قولباسشىسىنىڭ ورىنباسارى، پولكوۆنيك ءالىم يبرايەۆ.
بۇگىن تالدىقورعاندا ەفرەيتور عابدوللا سمايىلقانوۆتىڭ قۇرمەتىنە ول قىزمەت وتكەرگەن اسكەري بولىمدە ەسكە الۋ بۇرىشى اشىلدى. ءىس-شاراعا جەتىسۋ، ۇشتوبە گارنيزوندارىنىڭ باستىقتارى، 21751 اسكەري ءبولىمىنىڭ كومانديرى، قازا تاپقان اسكەري قىزمەتشىنىڭ تۋىستارى مەن جاقىندارى قاتىستى.
ەستەرىڭىزگە سالا كەتەيىك، اسكەري بورىشىن ورىنداۋ كەزىندە كورسەتكەن ەرلىگى مەن جانقيارلىعى ءۇشىن پودپولكوۆنيك ساندىبەك حايىروۆ ءىى دارەجەلى "ايبىن" وردەنىمەن، ەفرەيتور عابدوللا سمايىلقانوۆ ءىىى دارەجەلى "ايبىن" وردەنىمەن (قايتىس بولعاننان كەيىن) ماراپاتتالعان بولاتىن.