«حالىق قاتىساتىن بيۋدجەتتىڭ» ماقساتى – قالالىقتاردىڭ باستامالارى مەن ۇسىنىستارى نەگىزىندە الماتى قالاسى اۋداندارىنىڭ اۋماقتارىن دامىتۋ جانە اباتتاندىرۋ.
الماتىدا «حالىق قاتىساتىن بيۋدجەت» قالالىق جوباسى اياسىندا ۇسىنىستاردى قابىلداۋ باستالدى. الماتىلىقتار 20 شىلدەگە دەيىن budget.open-almaty.kz پورتالى ارقىلى ءوتىنىم بەرە الادى، دەپ حابارلايدى Almaty-akshamy.kz.
«حالىق قاتىساتىن بيۋدجەت» جوباسىنىڭ جالپى سوماسى 7،4 ملرد تەڭگەنى قۇرايدى. التى اۋدانعا - المالى، اۋەزوۆ، بوستاندىق، جەتىسۋ، مەدەۋ جانە تۇركسىب اۋداندارىنىڭ ءارقايسىسىنا 800 ملن. تەڭگەدەن قاراستىرىلعان. قالاعا قوسىلعان اۋماقتاردى دامىتۋ ماقساتىندا ناۋرىزباي جانە الاتاۋ اۋداندارىنىڭ ءارقايسىسىنا 1،3 ملرد.تەڭگەدەن.
بولىنگەن قالا بيۋدجەتىنىڭ قانداي باستامالارعا بولىنەتىنىن الماتى تۇرعىندارى اشىق داۋىس بەرۋ ارقىلى انىقتايدى. يدەيا اۆتورلارىنىڭ وتىنىمدەرىنە الماتى قالاسى قوعامدىق كەڭەسىنىڭ مۇشەلەرى، ساراپشىلار، ءماسليحات دەپۋتاتتارى، ۇەۇ وكىلدەرى دە ءوز باعاسىن بەرەدى.
جوبالىق ۇسىنىستار budget.open-almaty.kz پورتالى ارقىلى قابىلدانادى. ول ءۇشىن ءوتىنىمدى تولتىرۋ كەرەك (جوبالىق ۇسىنىستىڭ اتاۋى، ونىڭ سيپاتتاماسى، نىساننىڭ مەكەن-جايى)، جوبالىق ۇسىنىستىڭ نوبايى مەن سمەتاسىن مىندەتتى تۇردە قوسا بەرۋ كەرەك (بولجالدى بولۋى مۇمكىن). ءبىر جوبانىڭ ەڭ جوعارعى قۇنى 61،2 ميلليون تەڭگەدەن اسپاۋى كەرەك.
جوبالىق ۇسىنىستار كەلەسى ولشەمشارتتارعا سايكەس بولۋى كەرەك:
- ءبىر اۆتور – ءبىر ءوتىنىم – ءبىر نىسان؛
- قولجەتىمدىلىكتى شەكتەۋسىز جالپى پايدالانۋ نىسانى؛
- نىسان ىسكە اسىرىلۋى جوسپارلانعان اۋدان اۋماعىندا، جالپىعا قولجەتىمدى جەردە ورنالاسۋى كەرەك؛
- اكىمدىكتىڭ قۇزىرەتىندە بولۋى ءتيىس جانە ت.ب.
كەلەسى جوبالىق ۇسىنىستار قابىلدانبايدى:
- قۇرىلىس-مونتاجداۋ جۇمىستارىنسىز تەك جوبالىق-سمەتالىق قۇجاتتاردى ازىرلەۋگە ارنالعان؛
- بولاشاقتا قوسىمشا ەلەمەنتتەردى ەنگىزۋدى تالاپ ەتەتىن؛
- الماتى قالاسىنىڭ دامۋ باعدارلاماسىنا، قازاقستان رەسپۋبليكاسىنىڭ زاڭناماسىنا سايكەس كەلمەيتىن؛
- كوممەرسيالىق سيپاتتاعى جانە ت.ب.
اۋدان اكىمدىكتەرىنىڭ ساراپتاۋ كوميسسيالارى جوبالاردى «حالىق قاتىساتىن بيۋدجەتتى» ۇيىمداستىرۋ جانە ىسكە اسىرۋ تۋرالى ەرەجەنىڭ، قازاقستان رەسپۋبليكاسى زاڭناماسىنىڭ، الماتى قالاسىن دامىتۋ باعدارلاماسىنىڭ تالاپتارىنا سايكەس ىرىكتەيتىن بولادى.
اۋدان اكىمدىگىنىڭ ساراپتاما كوميسسياسىنىڭ قۇرامىن اۋدان اكىمى قالىپتاستىرادى جانە بەكىتەدى، ونىڭ قۇرامىنا ءماسليحات دەپۋتاتتارى، اۋداندىق ساۋلەتشى، قۇرىلىس سالاسىنىڭ مامانى، قۇرىلىس وبەكتىلەرىنىڭ سمەتالىق قۇجاتتامالارىن جاساۋ جونىندەگى مامان، الماتى قالاسىنىڭ قوعامدىق كەڭەسىنىڭ، قوعامدىق ۇيىمداردىڭ وكىلدەرى كىرەدى.
«حالىق قاتىساتىن بيۋدجەت» بويىنشا كەڭەستەردى نەمەسە اقپاراتتى الماتى قالاسىنىڭ اۋداندىق اكىمدىكتەرىنەن، سونداي-اق الماتى قالاسى اكىمدىگىنىڭ «Open Almaty» قوعامدىق قابىلداۋ بولمەسىنەن 224 39 29 (ىشكى 203) تەلەفونى ارقىلى الۋعا بولادى.