قارۋلى كۇشتەر – تاۋەلسىز ەلدىڭ قورعانى

الماتىدا وتان قورعاۋشىلار كۇنىنە ارنالعان سالتاناتتى كونسەرت ءوتتى، دەپ حابارلايدى Aqshamnews.kz

7 مامىر كۇنى رەسپۋبليكا سارايىندا «قارۋلى كۇشتەر – تاۋەلسىز ەلدىڭ قورعانى!» اتتى وتان قورعاۋشىلار كۇنىنە ارنالعان سالتاناتتى كونسەرت ۇيىمداستىرىلدى. شاراعا ارداگەرلەر، اسكەري قىزمەتكەرلەر، كۇشتىك قۇرىلىم وكىلدەرى، سونداي-اق قالا تۇرعىندارى مەن قوناقتارى جينالدى.

كونسەرت قازاقستان رەسپۋبليكاسىنىڭ مەملەكەتتىك ءانۇرانىن ورىنداۋمەن باستالدى. ساحنادا الماتى قالاسى اكىمىنىڭ ەسترادالىق-سيمفونيالىق وركەسترىنىڭ سۇيەمەلدەۋىمەن حالىق ءارتيسى تالعات كۇزەمبايەۆ، روزا رىمبايەۆا، ءبىرجان حاسانعالييەۆ، داۋرەن ءبايبورى، ولەگ تاتاميروۆ، «مۋزارت Life»، «جىگىتتەر» توبى، رايىمبەك باتىر اتىنداعى 38ء-شى دەسانتتىق-شابۋىلداۋ بريگاداسىنىڭ شىعارماشىلىق ۇجىمى جانە باسقا دا ونەر ادامدارى قاتىستى.

كورەرمەندەر اسكەري قىزمەت پەن ەل قورعاۋشىلاردىڭ ەرلىگىنە ارنالعان پاتريوتتىق اندەر مەن مۋزىكالىق شىعارمالاردى تىڭدادى. باعدارلامادا «ۆ زەمليانكە»، «جۋراۆلي» سەكىلدى اسكەري اندەر، پاتريوتتىق پوپۋرري جانە «ۇلى ەلىم»، «مەنىڭ وتانىم»، «ايبىندى ارميا»، «تۋعان جەر» سىندى اسەرلى اندەرى شىرقالدى.

كونسەرت سوڭىندا بارشا قاتىسۋشى وتانعا دەگەن سۇيىسپەنشىلىك پەن ادالدىقتىڭ سيمۆولىنا اينالعان «اتامەكەن» ءانىن قوسىلا شىرقادى.

بۇل كونسەرت اسكەري بورىشقا دەگەن قۇرمەتتىڭ، ءپاتريوتيزمنىڭ جانە حالىق بىرلىگىنىڭ جارقىن كورىنىسى بولدى.