9 مامىر كۇنى ساعات 21:00-دە اباي الاڭىندا ۇلى وتان سوعىسىنداعى جەڭىستىڭ 80 جىلدىعىنا وراي الماتىلىقتار مەن قالا قوناقتارىنا ەرەكشە جارىق شوۋى ۇسىنىلادى – 500-دەن استام درون قاتىساتىن اۋقىمدى كورىنىس وتەدى.
كورسەتىلىمنىڭ باستى ەرەكشەلىگى – سوعىس جىلدارىندا قازاقستاندى داڭققا بولەگەن باتىرلاردىڭ بەينەسى كورسەتىلەدى. الماتى اسپانىندا اتى اڭىزعا اينالعان قاھارمان قىزدار مانشۇك مامەتوۆا مەن ءاليا مولداعۇلوۆا، سونداي-اق، باۋىرجان مومىش ۇلىنىڭ بەينەسى جارىق ارقىلى جاندانادى. زاماناۋي تەحنولوگيالار مەن جارىق انيماسياسىنىڭ كومەگىمەن ولاردىڭ ەرلىگى مەن رۋحىن جەتكىزەتىن كورىنىستەر ارقىلى ەلگە تانىستىرىلادى.
درون-شوۋ بارىسىندا ەسكە الۋدىڭ بەلگىسى رەتىندە تىرنالار دا كورسەتىلەدى. ال شوۋدىڭ سوڭىندا قازاقتىڭ ويۋ-ورنەگى اياسىندا «جەڭىس كۇنى قۇتتى بولسىن!» دەگەن جازۋ پايدا بولادى.
بۇل زاماناۋي ۆيزۋالدى شوۋ – باتىرلارعا تاعزىم عانا ەمەس، سوعىس تۋرالى جاڭا، قولجەتىمدى، اسەرلى ءارى ەستە قالارلىق بايانداۋ ءتۇرى. ول تاريحي جادىمىزدى ساقتاۋ مەن كەلەر ۇرپاققا جەتكىزۋدىڭ ماڭىزدىلىعىن ەسكە سالادى.
ءىس-شارا دەمەۋشىلەردىڭ قولداۋىمەن بارلىق قاۋىپسىزدىك تالاپ ساقتالا وتىرىپ ۇيىمداستىرىلادى.
_انىقتاما:_ ۇيىمداستىرۋشىلار درون-شوۋدى تاماشالاۋعا ارنالعان بىرنەشە ىڭعايلى الاڭ دايىندادى. باستى ورىندار: اباي الاڭى، «قازاقستان» قوناق ءۇيىنىڭ ماڭى، Caspian University جانىنداعى ورىن جانە اباي داڭعىلى بويىنداعى اۋماقتار – نازاربايەۆ داڭعىلىنان دوستىق داڭعىلىنا دەيىن.
ءىس-شارانى دايىنداۋ جانە وتكىزۋگە بايلانىستى 9 مامىر كۇنى ساعات 18:00-دەن 21:30-عا دەيىن قالا ورتالىعىندا اۆتوكولىك قوزعالىسىنا ۋاقىتشا شەكتەۋ ەنگىزىلەدى. اباي داڭعىلىنىڭ نازاربايەۆ داڭعىلىنان دوستىق داڭعىلىنا دەيىنگى بولىگى، سونداي-اق، دوستىق داڭعىلىنىڭ قۇرمانعازى كوشەسىنەن ساتبايەۆ كوشەسىنە دەيىنگى ارالىعىندا جول جابىلادى.
الماتى قالاسىنىڭ اكىمدىگى قالا تۇرعىندارى مەن قوناقتارىن باعىتتى الدىن الا جوسپارلاۋعا جانە ۋاقىتشا قولايسىزدىققا تۇسىنىستىكپەن قاراۋعا شاقىرادى.