بۇعان قاتىستى سوتقا دەيىنگى تەرگەۋ امالدارى باستالدى.
"Artsport" باعدارلاماسىن جۇزەگە اسىرۋ كەزىندە جۇيەلى كەمشىلىكتەر ورىن الدى، دەپ حابارلايدى Almaty-akshamy.kz الماتى قالاسىنىڭ پروكۋراتۋراسىنا سىلتەمە جاساپ.
الماتى وبلىسىنىڭ پروكۋراتۋراسى جەتكىزۋشىلەر ءبىرىنىڭ تاراپىنان بيۋدجەت قاراجاتىن جىمقىرۋ فاكتىسىن انىقتادى.
جۇيەنىڭ كەمشىلىگى فۋتبول كلۋبىنىڭ ديرەكتورىنا ورىندالعان جۇمىس اكتىلەرىنە جالعان مالىمەت ەنگىزۋگە مۇمكىندىك بەرگەن.
اتالعان فاكتى بويىنشا بيىلعى 30 مامىردا اۋدان پروكۋراتۋراسى بيۋدجەت قاراجاتىن ۇرلاۋ فاكتىسى بويىنشا كلۋب ديرەكتورىنا قاتىستى سوتقا دەيىنگى تەرگەپ-تەكسەرۋ جۇمىستارىن باستادى.
سوت ۇكىمىمەن جەتكىزۋشى قىلمىس جاساعانى ءۇشىن كىنالى دەپ تانىلىپ، 3 جىلعا باس بوستاندىعىن شەكتەۋ جازاسى تاعايىندالدى.
سونىمەن قاتار سپورت كلۋبتارى مەن مادەني ۇيىرمەلەردىڭ سالىق زاڭناماسىن ساقتاۋ ماسەلەسى بويىنشا تەكسەرۋ جۇرگىزىلدى.
جەكەلەگەن جەتكىزۋشىلەر "ارتسپورت" جۇمىس ىستەپ تۇرعان كەزەڭىندە ققس سالىعىن تولەۋشىلەر رەتىندە قويىلماعان.
"پروكۋراتۋرا مەملەكەتتىك كىرىستەر دەپارتامەنتىنە قاداعالاۋ اكتىسىن ەنگىزدى، ناتيجەسىندە جەتكىزۋشىلەر 25 ميلليون تەڭگە كولەمىندە اكىمشىلىك جاۋاپتىلىققا تارتىلدى (ايىپپۇلدار تولەندى)"-دەلىنگەن الماتى قالاسى پروكۋراتۋراسى تاراتقان حابارلامادا.