ءدال وسىنداي اتپەن جارىق كورگەن كىتاپتىڭ تانىستىرىلىمى الماتىدا ءوتتى.
كىتاپتىڭ اۆتورى - يسلامتانۋشى، «بايكەن» مەشىتىنىڭ ۇستازى ءارى «بالاپان قاري» ورتالىعىنىڭ جەتەكشىسى ماليكا ايتجان قىزى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
تاعىلىمدى ءىس-شاراعا قمدب-نىڭ ءدىن ىستەرى جانە تالداۋ ءبولىمىنىڭ مەڭگەرۋشىسى نۇربەك ەسماعانبەت، الماتى قالاسىنىڭ باس يمامى تولەبي وسپان، نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ پرورەكتورى قايرات قۇرمانبايەۆ، المالى اۋداندىق «تولە بي» مەشىتىنىڭ باس يمامى ەرسىن امىرە، نۇر-مۇباراك ۋنيۆەرسيتەتىنىڭ وقىتۋشىلارى باۋىرجان ءالي ۇلى مەن قۇرمانعازى سادىبايەۆ قاتىستى.
الماتى قالاسىنىڭ باس يمامى، قاري تولەبي ءدادىل ۇلى: «قاسيەتتى قۇران – اللانىڭ ءسوزى. اللا تاعالانىڭ ءسوزىن تولىق جاتتاۋ – ءيسى مۇسىلماننىڭ ارمانى ەكەنى ءسوزسىز. اللا ەلشىسى (وعان اللانىڭ سالاۋاتى مەن سالەمى بولسىن) ءوزىنىڭ حاديس شاريفىندە: «ادامداردىڭ ەڭ جاقسىسى – قۇراندى جاتقا بىلگەن، اللانىڭ ءدىنىن جاقسى تۇسىنگەن، ادامداردى جاقسىلىققا شاقىرىپ، جاماندىقتان تىيعان جانە تۋعان-تۋىسپەن قارىم-قاتىناسى وتە كوركەم بولعان جان» دەگەن. اللاعا شۇكىر، بۇگىندە ەلىمىزدە قاريلىققا نيەت ەتىپ، قۇران جاتتاۋعا ىقىلاس تانىتۋشىلاردىڭ قاتارى كۇننەن كۇنگە ارتىپ كەلەدى. بۇل – وتە قۋانارلىق جايت. تەك وسى ماقساتتا تاباندىلىق، سابىرلىق پەن ىقىلاس كەرەكتىگىن باسا ەسكەرگەنىمىز ابزال. جاتتاۋدىڭ كوپتەگەن ادىس-تاسىلدەرى مەن ارتىقشىلىعى قامتىلعان بۇل كىتاپ، قالىڭ وقىرمەن ءۇشىن اسىرەسە، قۇران جاتتاپ، قاري اتانعىسى كەلەتىن ىنتالى قاۋىمعا پايدالى بولادى دەپ سەنەمىن».
ماليكا ەرگەشوۆانىڭ «قاري بولعىم كەلەدى» كىتابى جالپى وقىرمان قاۋىمعا، اسىرەسە، قۇران ۇيرەنىپ، ونى باسقالارعا ۇيرەتەمىن دەۋشىلەرگە ارنالعان. اتالمىش ەڭبەكتە قۇراننىڭ ۋاحي بولىپ تۇسكەن ساتىندەگى جاتتاۋ ەرەكشەلىكتەرى تۋرالى، قازىرگى ۋاقىتتاعى الەمدىك قاريلىق ادىستەمەلەرى ۇسىنىلعان. ودان وزگە بولاشاق قاريلارعا پايدالى اقىل-كەڭەستەر دە قامتىلىپتى. تاعى ايتا كەتەرلىگى، كىتاپقا قمدب ساراپتاما سەكتورىنىڭ وڭ قورىتىندىسى بەرىلگەن.