ۆاكسينالاۋ پاسپورتىن ساتىپ الماي تۇرىپ، ءوزىڭىز بەن جاقىندارىڭىزدىڭ دەنساۋلىعىنا ءقاۋىپ توندىرەتىنىڭىزدى ويلاڭىز!
بۇگىن ق ر دسم سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا وسىلاي دەدى، دەپ حابارلايدى Almaty-akshamy.kz
«پاسپورتتىڭ راس-وتىرىگىن تەكسەرۋ مۇمكىن ەمەس، ادامنىڭ ءوزى ۆاكسينا الماعانىن، جالعان قۇجات جاساتقانىن مويىنداسا عانا اشىلادى. بۇل رەتتە، قۇرمەتتى قازاقستاندىقتار، سىزدەر ۆاكسينالاۋ پاسپورتىن ساتىپ العاندا كەم دەگەندە رەانيماسياعا بيلەت ساتىپ العانىڭىزدى ەسكەرىڭىز. سوندىقتان، مەملەكەت تەگىن قورعانۋعا مۇمكىندىك بەرىپ وتىرعان كەزدە ءسىز ءوز قاراجاتىڭىزدى جالعان پاسپورتقا جۇمساعاندا، جوعارىدا ايتقانىمداي، اۋىرىپ قالۋعا، ءتىپتى قايتىس بولۋعا جولداما العانمەن تەڭ بولاسىز. سوندىقتان، وزدەرىڭىز ويلانىپ كورىڭىزدەر»، - دەدى ايجان ەسماعامبەتوۆا.
سپيكەردىڭ ايتۋىنشا، قولدان جاسالعان پاسپورت ءۇشىن جاۋاپكەرشىلىك قاراستىرىلعان.
«پاسپورتتى قولدان جاساۋ ءۇشىن دە، قولدان جاساۋ پروسەدۋراسى ءۇشىن دە، ونى ساتىپ الۋ ءۇشىن دە جاۋاپكەرشىلىك قاراستىرىلعان. دەنساۋلىق ساقتاۋ مينيسترلىگىنىڭ ءوزى ۆەدومستۆوارالىق كوميسسيادا جالعان ۆاكسينالاۋ پاسپورتتارى ماسەلەسىن كوتەردى. ىشكى ىستەر مينيسترلىگى قولدان جاسالعان پاسپورتتار بويىنشا ءبىرقاتار قىلمىستىق ءىس قوزعادى. اسىرەسە، ۆاكسينالاۋدىڭ تيىمدىلىگىنە كۇمان كەلتىرىپ جاتقاندا بۇعان جول بەرۋگە بولمايدى. ۆاكسينالاۋ پاسپورتىن ساتىپ الماي تۇرىپ، ءوزىڭىزدىڭ جانە جاقىندارىڭىزدىڭ دەنساۋلىعىنا ءقاۋىپ توندىرەتىنىڭىزدى ويلاڭىز، سەبەبى ۆيرۋس تاسىمالداۋشىسى بولۋىڭىز ابدەن مۇمكىن»، - دەدى دسم وكىلى.