بۇرىن ءدارىحانادا كوپ ساتىلا قويمايتىن زاتتىڭ ءبىرى بەتپەردە بولسا، بۇگىندە ول كۇندەلىكتى قاجەتتىلىككە اينالدى.
ق ر دسم سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا "ۆاكسينا السام، بەتپەردە تاعۋدىڭ كەرەگى جوق دەيتىندەر قاتەلەسەدى" دەيدى، دەپ حابارلايدى Almaty-akshamy.kz
«بەتپەردە تاعۋ قازىرگى جاعدايدا عانا ەمەس، پاندەميا جاريالانعاننان ساتتەن بەرى وزەكتى. ۆاكسينا الدىق، ەندى ماسكا تاعۋدىڭ، قاشىقتىق ساقتاۋدىڭ قاجەتى جوق دەپ ويلايتىندار قاتەلەسەدى. ازىرگە ۇجىمدىق يممۋنيتەت قالىپتاسقان جوق، ۆيرۋس قوعامدا جوعارى دەڭگەيدە تارالىپ جاتىر، وكىنىشكە وراي، ۆاكسينا العاندار دا اۋىرىپ قالۋى مۇمكىن»، - دەپ اتاپ ءوتتى ول ورتالىق كوممۋنيكاسيالار قىزمەتىندە وتكەن بريفينگتە.
ايجان ەسماعامبەتوۆانىڭ ايتۋىنشا، ۆاكسينامەن قاتار الدىن الۋ شارالارىن دا ساقتاۋ ماڭىزدى.
«ءوزىڭىز تۋرالى، جاقىندارىڭىز بەن قارت تۋىستارىڭىز تۋرالى ويلانىڭىز. "دەلتا" شتامىنىڭ دا الدەقايدا جۇقپالى، كوپ ادامعا تەز تارالاتىنىن جانە اۋرۋدىڭ كۇردەلى جاعدايدا وتەتىنىن ەستە ساقتاڭىز. قۇرمەتتى قازاقستاندىقتار، وتىنەمىز، بارلىق الدىن الۋ شارالارىن ساقتاڭىزدار»، - دەدى ق ر دسم سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى.
بۇعان دەيىن ايجان ەسماعامبەتوۆانىڭ ۆاكسينالاۋ پاسپورتىن ساتىپ الۋ رەانيماسياعا جولداما العانمەن تەڭ دەگەنىن حابارلاعان ەدىك.