الماتى پوليسياسى قاراۋسىز جۇرگەن بالالاردىڭ اتا-انالارى جازالاناتىنىن ەسكەرتەدى.
الماتى يۋۆەنالدى پوليسياسىنىڭ مالىمەتىنشە، وتكەن جىلى قالادا قايىرشىلىقپەن اينالىسقان 245 شەتەلدىك كامەلەتكە تولماعان انىقتالدى. سونداي ەپيزودتىڭ ءبىرى كەشە بولدى. سەيفۋللين مەن اباي داڭعىلدارىنىڭ قيىلىسىندا قايىر سۇراپ جۇرگەن 15 جاستاعى جەتكىنشەك تابىلدى، دەپ حابارلايدى aqshamnews.kz.
– جاس جىگىتتىڭ وزبەكستان ازاماتى ەكەندىگى جانە اكەسىمەن بىرگە الماتى وبلىسى تالعار اۋدانىندا جالدامالى پاتەردە تۇراتىندىعى بەلگىلى بولدى. بالا قايىرشىلىقپەن اينالىسادى، وقۋ ۇدەرىسىنە ارالاسپايدى، ال اكەسى - جۇمىسسىز. ولاردى تەكسەرۋ ءۇشىن اكەسى مەن بالاسى ءبىزدىڭ بولىمشەگە جەتكىزىلدى. اتا-اناعا قاتىستى اتا-انالىق مىندەتتەرىن تيىسىنشە ورىنداماعانى ءۇشىن ق ر اقبتك-نىڭ 127-بابىنا سايكەس اكىمشىلىك حاتتاما تولتىرىلدى. ال ءجاسوسپىرىم كامەلەتكە تولماعانداردى بەيىمدەۋ ورتالىعىنا ورنالاستىرىلدى، - دەدى المالى اۋداندىق پوليسيا باسقارماسى باستىعىنىڭ ورىنباسارى ماقسات پشان.
سونداي-اق ىشكى ىستەر ءمينيسترى جاريالاعان پروفيلاكتيكالىق ءىس-شارالار جىلى اياسىندا، باسقا قالادان كەلگەن جاسوسپىرىمدەردى جەدەل انىقتاۋ ماقساتىندا يۋۆەنالدى جانە كريمينالدىق پوليسيا، ۋچاسكەلىك پوليسيا ينسپەكتورلارى قىزمەتكەرلەرىنەن تۇراتىن توپتار، جاستار مەن جاسوسپىرىمدەر كوپ شوعىرلاناتىن ورىنداردا، اتاپ ايتقاندا، اۋلالار، جەرتولەلەر، بازارلار، ويىن-ساۋىق ورىندارى، ۆوكزالدار، ساياباقتاردا كۇن سايىن رەيد جۇرگىزەدى.