الماتىداعى جاڭا مەديسينا ورتالىعى: قاراسۋ جانە وجەت شاعىن اۋداندارىنىڭ 20 مىڭنان استام تۇرعىنى قادامدىق قولجەتىمدىلىكتە مەديسينالىق كومەك الا الادى
الماتى اكىمى ەربولات دوسايەۆ الاتاۋ اۋدانىنا جاساعان جۇمىس ساپارى بارىسىندا قاراسۋ شاعىن اۋدانىنداعى مەديسينالىق-سانيتارلىق كومەك ورتالىعىنىڭ (مساك) جاڭا عيماراتىنا باردى، دەپ حابارلايدى aqshamnews.kz
بۇعان دەيىن قاراسۋ شاعىن اۋدانىنداعى 18 مىڭنان استام تۇرعىنعا مەديسينالىق كومەك 160 شارشى مەترلىك №21 ەمحانا فيليالىندا كورسەتىلىپ كەلگەن. ال شامامەن 24 مىڭ ادام تۇراتىن وجەت شاعىن اۋدانىنىڭ تۇرعىندارىنا №25 قالالىق ەمحانا قىزمەت كورسەتەدى. مەديسينالىق مەكەمەلەردىڭ جۇكتەمەسىن ازايتۋ جانە قاراسۋ مەن وجەت تۇرعىندارىنا ساپالى مەديسينالىق قىزمەت كورسەتۋ ماقساتىندا قادامدىق قولجەتىمدى جەردە زاماناۋي دارىگەرلىك امبۋلاتوريا سالۋ قاجەتتىلىگى تۋىندادى.
تۇرعىنداردىڭ ءوتىنىشىن ەسكەرە وتىرىپ، اكىمنىڭ تاپسىرماسىمەن جاڭا ورتالىقتىڭ قۇرىلىسى 2023 جىلدىڭ اقپان ايىندا باستالدى. قازىرگى تاڭدا قۇرىلىس جۇمىستارى تولىعىمەن اياقتالعان. بيىلعى جىلدىڭ قاراشا ايىنىڭ سوڭىنا دەيىن عيماراتتى پايدالانۋعا بەرۋ جانە ونى قالالىق قوعامدىق دەنساۋلىق ساقتاۋ باسقارماسىنىڭ بالانسىنا وتكىزۋ جوسپارلانعان. ءتيىستى رۇقسات قۇجاتتارىن، سونىڭ ىشىندە قىزمەت كورسەتۋ ليسەنزياسىن العاننان كەيىن مساك ورتالىعى العاشقى پاسيەنتتەردى قابىلداي باستايدى. الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى نازگۇل يمانعالييەۆانىڭ ايتۋىنشا، ورتالىقتى اشۋ وسى جىلدىڭ جەلتوقسان ايىنا جوسپارلانعان.
بەس قاباتتى جاڭا مەديسينالىق-سانيتارلىق العاشقى كومەك كورسەتۋ ورتالىعى №25 قالالىق ەمحانانىڭ فيليالى بولىپ تابىلادى جانە قاراسۋ مەن وجەت شاعىن اۋداندارىنىڭ شامامەن 20 مىڭ تۇرعىنىنا قىزمەت كورسەتەدى. جوبالىق قۋاتى – ءبىر اۋىسىمدا 200 ادام قابىلداۋ. جاڭا عيماراتتا ءتورت بولىمشە بار: ۋچاسكەلىك قىزمەت، مامانداندىرىلعان مەديسينالىق كومەك ءبولىمى، گينەكولوگيا، كلينيكالىق-دياگنوستيكالىق بولىمشە. ورتالىق ۋدز، رەنتگەن، اۋديوگرامما، سپيروگرافيا، كولپوسكوپيا، ەكگ سياقتى زاماناۋي جابدىقتارمەن قامتاماسىز ەتىلگەن.
جاڭا مەديسينالىق مەكەمەنىڭ اشىلۋى №25 جانە №21 ەمحانالارداعى جۇكتەمەنى ازايتۋعا مۇمكىندىك بەرەدى، ءارى تۇرعىندار قاجەتتى كومەكتى زاماناۋي جانە ىڭعايلى مەديسينالىق مەكەمەدە جىلدام الا الادى.
2024 جىلدىڭ باسىنان باستاپ الماتىدا ءۇش وتباسىلىق-دارىگەرلىك امبۋلاتوريا پايدالانۋعا بەرىلدى. ولار اۋىسىمىنا 100 ادام قابىلدايتىن نۇرشاشقان شاعىن اۋدانىندا، ءبىر اۋىسىمدا 200 ادام قابىلدايتىن مامىر شاعىن اۋدانىندا جانە اۋىسىمىنا 200 ادام قابىلدايتىن كەمەل شاعىن اۋدانىندا ورنالاسقان.
