اكىمنىڭ باقىلاۋىندا: الماتىدا سۋمەن جابدىقتاۋدىڭ كوپجىلدىق پروبلەماسى قالاي شەشىلۋدە
الماتى اكىمى ەربولات دوسايەۆ الاتاۋ اۋدانىنا جۇمىس ساپارى بورالداي شاعىن اۋدانىنداعى سۋمەن جابدىقتاۋ جانە كارىز جەلىلەرى قۇرىلىسىنىڭ بارىسىمەن تانىستى، دەپ حابارلايدى aqshamnews.kz
2014 جىلى قالاعا قوسىلعان شاعىن اۋداندا ينجەنەرلىك جەلىلەر بولعان جوق. 2019 جىلى تەك 8،2 كم ماگيسترالدىق جەلىلەر سالىندى. وسى جىلدىڭ قىركۇيەك ايىندا قالا باسشىسىنىڭ تاپسىرماسى بويىنشا 76،4 كم جەلى، ونىڭ ىشىندە 52،1 كم – سۋ قۇبىرى جانە 24،3 كم – كارىز قۇرىلىسىن كوزدەيتىن اۋقىمدى جوبا باستالدى. وسىلايشا، الاتاۋ اۋدانى اكىمدىگىنىڭ مالىمەتى بويىنشا بورالداي شاعىن اۋدانىنىڭ 4 مىڭنان استام تۇرعىنى ورتالىق كوممۋنيكاسيالارمەن قامتىلاتىن بولادى.
بۇگىنگى تاڭدا 7 كم جەلى سالىندى. نىسانداردىڭ قۇرىلىسىن اياقتاۋ جانە پايدالانۋعا بەرۋ 2025 جىلدىڭ قازان ايىنا جوسپارلانىپ وتىر.
ەربولات دوسايەۆ الاتاۋ اۋدانىنىڭ اكىمىنە جۇمىستاردى ورىنداۋ كەستەسى مەن ساپاسىن باقىلاۋدا ۇستاۋدى تاپسىردى. قالا باسشىسى جوبا بەلگىلەنگەن مەرزىمدە اياقتالىپ، بارلىق ستاندارتتارعا ساي بولۋى ءتيىس ەكەنىن اتاپ ءوتتى، ويتكەنى سۋمەن جابدىقتاۋ جانە كارىز جۇيەسى جايلى جانە ءقاۋىپسىز تۇرۋدىڭ نەگىزى بولىپ تابىلادى.
ەستەرىڭىزگە سالا كەتەيىك، الماتىدا ينجەنەرلىك ينفراقۇرىلىمدى جاڭعىرتۋ جۇمىستارى بەلسەندى جۇرگىزىلۋدە. وسى جىلدىڭ 9 ايىندا 219 كم جاڭا سۋمەن جابدىقتاۋ جانە سۋ بۇرۋ جەلىلەرى سالىندى، 27،3 كم قولدانىستاعى جەلىلەر جاڭعىرتىلدى. 2025 جىلى تاعى 240 كم قۇرىلىس جانە 48 كم جەلىنى جاڭعىرتۋ جوسپارلانعان.
وسىلايشا، 100 مىڭعا جۋىق قالا تۇرعىنى ءۇشىن قابىلدانعان شارالار كەشەنىنىڭ ارقاسىندا ينجەنەرلىك جەلىلەردىڭ جوعارى توزۋىنا بايلانىستى سۋمەن جابدىقتاۋ مەن سۋ بۇرۋدىڭ كوپجىلدىق پروبلەماسى شەشىلەتىن بولادى.