قازاقستاندا «قاراسورا-2022» كەڭ اۋقىمدى جەدەل الدىن الۋ ءىس-شاراسى جۇرگىزىلىپ جاتىر.
بۇل تۋرالى ق ر ءىىم باسپا ءسوز قىزمەتىنىڭ وكىلى اقتوتى بورانوۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءىىم وپەراسيانى جىل سايىن 1 ماۋسىم مەن 30 قازان ارالىعىندا ماريحۋانا مەن گاشيش دايىندالاتىن قاراسورانىڭ پىسىپ-جەتىلۋىنە بايلانىستى وتكىزەدى. ونىڭ ماقساتى – قازاقستان اۋماعىنداعى ەسىرتكى بازاسىنىڭ وسىمدىك شيكىزاتتارىن جويۋ، شەتەلدەن ەسىرتكى جەتكىزۋ ارنالارىن انىقتاۋ، سونىمەن قاتار قۇرامىندا ەسىرتكى زاتتارى بار وسىمدىكتەردى ءوسىرۋ جانە دايىنداۋ فاكتىلەرىنىڭ جولىن كەسۋ»، - دەدى اقتوتى بورانوۆا ۆەدومستۆونىڭ باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، وپەراسياعا قورعانىس مينيسترلىگىنىڭ، ۇلتتىق ۇلاننىڭ كۇش-قۇرالدارى، ءىىم ارناۋلى بولىمشەسى جانە «عارىش ساپارى» اق، جول تالعامايتىن كولىكتەر، تىكۇشاقتار مەن ۇشقىشسىز ۇشاتىن اپپاراتتار جۇمىلدىرىلعان.
«ماۋسىم ايىنىڭ باسىنان بەرى 457 ەسىرتكى قىلمىسى، ونىڭ ىشىندە 235 ەسىرتكى ساتۋ، 52 ءىرى كولەمدە ەسىرتكى ساقتاۋ، 135 قاراسورا ءوسىرۋ جانە 24 ەسىرتكى كونترابانداسى فاكتىسى انىقتالدى. ءبىر ۇيىمداسقان قىلمىستىق توپتىڭ كوزى جويىلىپ، جاسىرىن 6 زەرتحانانىڭ جۇمىسىنا توسقاۋىل قويدى. زاڭسىز اينالىمنان 2 تونناعا جۋىق ەسىرتكى زاتى، ونىڭ ىشىندە 773 كەلى ماريحۋانا، 61 كەلى گاشيش، 16 كەلى سينتەتيكالىق ەسىرتكى جانە 7 گرامم گەروين تاركىلەندى. سونىمەن قاتار 190 مىڭ تۇپتەن استام قۇرامىندا ەسىرتكى بار وسىمدىك تابىلىپ، جويىلدى»، - دەدى ول.