قاراشانىڭ باسىندا كۇن جىلى بولادى

سينوپتيكتەر كۇزدىڭ ءۇشىنشى ايىنىڭ باسىندا كۇن جىلى بولادى دەپ بولجادى.

بۇل رەتتە رەسپۋبليكانىڭ باسىم بولىگىندە سيكلوندار مەن انتيسيكلونداردىڭ اۋىسۋىمەن جاڭبىر مەن قار جاۋىپ، كوكتايعاق بولادى، تۇمان ءتۇسىپ، ەكپىندى جەل سوعادى، كۇن رايى قۇبىلمالى بولادى، دەپ حابارلايدى Almaty-akshamy.kz.

تەك رەسپۋبليكانىڭ باتىسى مەن وڭتۇستىگىندە – قاراشانىڭ باسىندا، ال ءبىرىنشى ونكۇندىكتىڭ ورتاسىنان باستاپ قازاقستان رەسپۋبليكاسىنىڭ باسىم بولىگىندە جاۋىن-شاشىن توقتايدى دەپ بولجانادى.

قاراشانىڭ ءبىرىنشى ونكۇندىگىنىڭ سوڭى مەن ەكىنشى ونكۇندىگىنىڭ باسىندا انتيسيكلوننىڭ السىرەۋىمەن كۇن جىلىنادى.

قاراشانىڭ ەكىنشى جانە ءۇشىنشى ونكۇندىگىندە دە كۇن رايى قۇبىلمالى بولادى: جىلى جانە ايازدى كۇندەر ءجيى الماسىپ تۇرادى، جاۋىن-شاشىن (جاڭبىر، قار)، ەكپىندى جەل بولجاندى. سولتۇستىك وبلىستاردا كەي كۇندەرى بۇرقاسىن بولۋى مۇمكىن، قازاقستان رەسپۋبليكاسىنىڭ اۋماعىندا كوكتايعاق پەن تۇماندى بولادى.

الدىن الا بولجام بويىنشا قاراشادا اۋانىڭ ورتاشا ايلىق تەمپەراتۋراسى رەسپۋبليكانىڭ باسىم بولىگىندە نورمادان 1-2° جوعارى، جەتىسۋدىڭ وڭتۇستىگىندە جانە الماتى وبلىسىنىڭ وڭتۇستىك-شىعىس جارتىسىندا نورماعا جاقىن بولادى دەپ بولجاندى.

قاراشا ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورماعا جاقىن، قىزىلوردا، تۇركىستاننىڭ باسىم بولىگىندە، جامبىلدىڭ سولتۇستىك-باتىسىندا، ماڭعىستاۋ، اقتوبەنىڭ وڭتۇستىك-شىعىس جارتىسىندا، ۇلىتاۋ وبلىسىنىڭ وڭتۇستىك-باتىسىندا نورمادان از بولادى دەپ بولجاندى.