قاراساي باتىر كوشەسىندەگى جاياۋ جۇرگىنشىلەر اللەياسىن اباتتاندىرۋ جۇمىسى اياقتالىپ قالدى. بۇل اللەيا ناۋرىزباي باتىر كوشەسىنەن ابىلاي حان داڭعىلىنا دەيىنگى ارالىقتى قامتىعان.
"قالا ورتالىعىنىڭ ماڭىزدى بولشەگىنە اينالعان كوشە ەندى جاڭا سيپاتقا يە بولىپ، زامانعا لايىق، جايلى جانە كوگالداندىرىلعان كەڭىستىككە اينالدى. جوبا "حالىق قاتىساتىن بيۋدجەت" باعدارلاماسى اياسىندا قولعا الىنىپ، ول جاقىن ماڭداعى جاڭارتىلعان قاراعايلى سكۆەرىمەن جالعاسقان. بۇل ەكى كەڭىستىك بىرىگىپ، قالانىڭ جاسىل ينفراقۇرىلىمىنىڭ ءوزارا بايلانىستىراتىن ءبىرتۇتاس جاياۋ جۇرگىنشىلەر مەن دەمالىس ايماعى بولادى"، - دەپ مالىمدەدى المالى اۋدانىنىڭ اكىمى ارمان شامشين باسپا ءسوز تۋرى بارىسىندا.
قاراساي باتىر كوشەسىنىڭ بويىنداعى اللەيا – بۇل جاي عانا جاياۋ جۇرگىنشىلەر ءدالىزى ەمەس، ول الماتىلىقتاردىڭ كۇندەلىكتى ءومىرىنىڭ ماڭىزدى بولىگى. مۇندا ءدامحانالار جۇمىس ىستەيدى، حالىق سەرۋەندەپ، كەشكى ۋاقىتتا تۇرعىندار اعاشتىڭ ساياسىندا دەمالادى. بۇل اۋماقتا سوڭعى رەت جوندەۋ جۇمىسى 2017 جىلى جۇرگىزىلگەن، سودان بەرى كەڭىستىك ءوزىنىڭ كوركەمدىك كەلبەتى مەن ءبىرقاتار قىزمەتىن جوعالتقان ەدى. تۇرعىنداردىڭ ءوتىنىشى مەن قالالىق بيلىكتىڭ قولداۋىنىڭ ارقاسىندا مۇندا 2025 جىلدىڭ ساۋىرىندە كۇردەلى جوندەۋ جۇمىسى باستالدى. ءقازىر جۇمىستىڭ 70% اياقتالعان. قالعان جۇمىستار شىلدەنىڭ العاشقى ونكۇندىگىندە اياقتالىپ قالادى دەپ جوسپارلانىپ وتىر.
اباتتاندىرۋدىڭ جالپى اۋماعى – 8 500 م². ونىڭ 8 200 م² جۋىعى كوگالداندىرىلدى. بارلىق جامىلعىلارى جاڭارتىلدى: 3 120 م² اسفالتتالىپ، 1 865 م² الاڭعا قالىڭدىعى 6 سم بولاتىن برۋسچاتكا توسەلدى. سونىمەن قاتار، 206 مەتر بورديۋر مەن 1 947 مەتر پورەبريك ورناتىلدى. كىشى ارحيتەكتۋرالىق فورمالار مەن جارىقتاندىرۋ ماسەلەسىنە دە ەرەكشە كوڭىل ءبولىندى: 18 جاڭا ورىندىق پەن جاڭا ۇلگىدەگى 28 شام ورناتىلدى.
3 200 م² ەسكى جابىن الىنىپ تاستالىپ، 10 اعاش كەسىلدى. بۇل كوشەنىڭ تابيعي كەلبەتىن ساقتاپ قانا قويماي، ونىڭ ەكولوگياسىن جاقسارتۋعا دا سەپ بولماق.
"اباتتاندىرۋ تۇجىرىمداماسى ورنىقتى قالالىق دامۋ جانە جاياۋ جۇرگىنشىلەرگە باسىمدىق بەرۋ قاعيداتتارىنا نەگىزدەلگەن. قاراساي باتىر كوشەسى قاتىنايتىن باعىت قانا ەمەس، سەرۋەندەۋگە، كەزدەسۋ مەن دەمالۋعا ارنالعان جايلى، ءقاۋىپسىز قالالىق كەڭىستىككە اينالادى. الماتى وزگەرىپ، اباتتانىپ، جايلى قالاعا اينالىپ جاتىر"، – دەپ تولىقتىردى اۋدان اكىمى.