قاراقات ابدەننىڭ سايلاۋالدى شتابى قان تاپسىردى

ءومىر سۇرۋگە ءۇمىت سىيلادى

قاراقات ابدەننىڭ سايلاۋالدى شتابىنىڭ مۇشەلەرى ترانسفۋزيولوگيا عىلىمي وندىرىستىك ورتالىعىندا قان تاپسىرىپ، دونور اتاندى.

ءىس-شاراعا قاتىسقان شتاب مۇشەلەرى 10 000 ميلليليترگە جۋىق قان تاپسىردى. دونورلىق قان اۋىر ناۋقاستاردى ەمدەۋدە جانە شۇعىل مەديسينالىق كومەك كورسەتۋ كەزىندە اسا قاجەت.ترانسفۋزيولوگ-مامانداردىڭ ايتۋىنشا، ءار دونوردان 450 مل. قان الىنادى. بۇل ادام دەنساۋلىعىنا زيانىن تيگىزبەيدى، كەرىسىنشە كوپ جاعدايدا پايدالى بولماق.

پرەزيدەنتتىككە كانديدات قاراقات ابدەن بۇل باستامانىڭ الەۋمەتتىك ماڭىزى زور ەكەندىگىن اتاپ ءوتتى.

«بۇگىن ءبىز شتاب مۇشەلەرى «ءومىر سۇرۋگە ءۇمىت سىيلا» دەگەن ۇرانمەن قان تاپسىرۋعا كەلدى. جالپى، بۇل باستامانىڭ الەۋمەتتىك ماڭىزى زور دەپ بىلەمىن. دونور قانى ادامنىڭ ءومىر قۇتقارا الادى، قيىن جاعدايعا تاپ بولعان جانداردىڭ دەنساۋلىعىن ساقتاپ قالۋدىڭ كەپىلى بولا الادى. ءبىز ءۇشىن ادام ءومىرى مەن ونىڭ دەنساۋلىعىنان باعالى ەشتەڭە جوق. وسىنداي يگى ىستەردە حالىقتىڭ بەلسەندىلىگى ارتا تۇسسە ەكەن دەيمىز. وزگەلەرگە كومەك كورسەتىپ، دەر كەزىندە قول ۇشىن سوزۋ ءبىزدى بىرىكتىرەدى»، - دەدى كانديدات.

ەسكە سالساق، ەلىمىزدە 20 قاراشا كۇنى كەزەكتەن تىس پرەزيدەنت سايلاۋى وتەدى. كانديدات ق.ابدەن ەل ايماقتارىن ارالاپ، 8 وبلىستا 30-دان استام كەزدەسۋ وتكىزدى. الداعى ۋاقىتتا ول تۇركىستان جانە جامبىل وبلىستارىنىڭ سايلاۋشىلارىمەن جۇزدەسەدى.