پرەزيدەنتتىككە كانديدات قاراقات ابدەننىڭ ەل وڭىرلەرىندەگى سايلاۋالدى ساپارلارى جالعاسۋدا. بۇگىن ول شىمكەنت قالاسىنىڭ سايلاۋشىلارىمەن جۇزدەسىپ، ءوزىنىڭ سايلاۋالدى باعدارلاماسىن تانىستىردى.
قالا تۇرعىندارى، تۋريستىك سالا ماماندارى، قازاق ۇلتتىق تاعامدارىنا نەگىزدەلگەن مەيرامحانالاردىڭ وكىلدەرى مەن كاسىپكەر ايەلدەر قاتىسقان كەزدەسۋ بارىسىندا قوعامداعى وزەكتى ماسەلەلەر مەن ءتۋريزمدى دامىتۋ سۇراقتارى تالقىلاندى.
«شىمكەنت قالاسىنىڭ ىشكى جانە سىرتقى ءتۋريزمدى دامىتۋدا الەۋەتى وتە زور. جاڭا جۇمىس ورىندارىنىڭ اشىلۋى مەن ينفراقۇرىلىمنىڭ جاقسارۋى – بۇل ءتۋريزمدى دامىتۋدىڭ ءبىر عانا قىرى. وسى سالانى جەتىلدىرۋ ارقىلى ءبىز ەلىمىزدىڭ ۇلتتىق جانە تاريحي-مادەني قۇندىلىقتارىن كەڭىنەن ناسيحاتتاي الامىز. قازاق ۇلتتىق تاعامدارىن جاڭعىرتىپ، تۋريستەردى قىزىقتىرۋدىڭ ەڭ ۇتىمدى باعىتىن دامىتىپ جۇرگەن كاسىپكەرلەردىڭ دە باستامالارىنا قولداۋ كورسەتۋ كەرەك»،- دەدى ق.ابدەن.
سايلاۋشىلارمەن كەزدەسۋدەن كەيىن كانديدات ءوڭىردىڭ تىنىس-تىرشىلىگىمەن تانىسىپ، قالادا ءوتىپ جاتقان «كوكساراي» فۋتبول ءتۋرنيرىنىڭ جەڭىمپازدارىمەن كەزدەستى. ءوزىنىڭ قۇتتىقتاۋ سوزىندە قاراقات ابدەن بۇقارالىق سپورت پەن سالاۋاتتى ءومىر سالتىن ناسيحاتتاۋدىڭ ماڭىزىن ەرەكشە اتاپ ءوتتى.
بۇدان بولەك، كانديدات ايماقتاعى سايلاۋالدى شتابىنىڭ وكىلدەرىمەن جۇزدەسىپ، ۇگىت-ناسيحات جۇمىستارىنىڭ ناتيجەلەرىمەن تانىستى.
ەسكە سالساق، ەلىمىزدە 20 قاراشا كۇنى كەزەكتەن تىس پرەزيدەنت سايلاۋى وتەدى. كانديداتق.ابدەن ەل ايماقتارىن ارالاپ، 8 وبلىستا 30-دان استام كەزدەسۋ وتكىزدى. الداعى ۋاقىتتا ول تۇركىستان جانە جامبىل وبلىستارىنىڭ سايلاۋشىلارىمەن جۇزدەسەدى.