قاراقات ابدەن قىزىلوردا وبلىسىنىڭ تۇرعىندارىمەن كەزدەستى

پرەزيدەنتتىككە كانديدات قاراقات ابدەننىڭ قىزىلوردا وبلىسىنداعى سايلاۋالدى كەزدەسۋلەرى ءوتتى. ول جاقىن جانە شالعاي جاتقان ەلدىمەكەندەردىڭ جاعدايىمەن تانىسىپ، ارال قالاسىنا ات باسىن بۇردى، دەپ حابارلايدى Almaty-akshamy.kz. 
 
وبلىستاعى ۇلكەن ايماقتاردىڭ ءبىرى بولىپ سانالاتىن ارال قالاسىندا ول جەرگىلىكتى حالىقپەن جۇزدەسىپ، سايلاۋالدى باعدارلاماسىن تانىستىردى. بۇدان بولەك، كانديدات وسى وڭىردە ۇلتتىق جانە وتباسىلىق قۇندىلىقتاردى نەگىزگە الىپ، كاسىبىن دوڭگەلەتىپ وتىرعان وتباسىلىق بيزنەس وكىلدەرىمەن كەزدەستى. 

ارالدا قوزعالعان ماڭىزدى تاقىرىپتار قىزىلوردا قالاسىنداعى كەزدەسۋدە جالعاسىن تاپتى. جيىن بارىسىندا قوعامداعى وزەكتى ماسەلەلەر، وسكەلەڭ ۇرپاق پەن جاستار تاربيەسى، وتباسى ينستيتۋنىڭ ءمانى تالقىلاندى. كانديدات قوعامنىڭ دەرتىنە اينالعان سينتەتيكالىق ەسىرتكى، قۇمار ويىندار مەن جات مادەنيەتكە ەلىكتەگىش جاستاردىڭ ارەكەتتەرىنە ەرەكشە توقتالدى. ونىڭ ايتۋىنشا، بۇعان ۇلتتىق قۇندىلىقتاردىڭ ءتيىستى دەڭگەيدە ناسيحاتتالماۋى، وتباسى تاربيەسىنىڭ السىرەۋى سەبەپ. 

 ەسكە سالساق، ەلىمىزدە 20 قاراشا كۇنى كەزەكتەن تىس پرەزيدەنت سايلاۋى وتەدى. ۇمىتكەر ق.ابدەن ەل ايماقتارىن ارالاپ، 13 قالا مەن بىرنەشە اۋىلدىق ەلدىمەكەندە 20-دان استام كەزدەسۋ وتكىزدى الداعى ۋاقىتتا ول سولتۇستىك قازاقستان، تۇركىستان، جامبىل وبلىستارىنىڭ سايلاۋشىلارىمەن كەزدەسۋ وتكىزەدى.