اقتاۋداعى «قاراكول» جاساندى سۋ قويماسىنا جۇزگە جۋىق قاراباي قۇسى ۇشىپ كەلدى.
سۋ ايدىنى ماڭىنداعى وندىرىستىك الاڭدا جۇرگەن قاناتتىلاردى قالا تۇرعىنى ۆيدەوعا ءتۇسىرىپ، عالامتوردا جاريالاعان. قاراباي قۇسى قازاقستاننىڭ قىزىل كىتابىنا ەنگىزىلگەن. بۇرىن ارال تەڭىزى مەن تورعاي سۋ الاپتارىندا، سونداي-اق بالقاش ماڭىنداعى قامىستى جەرلەرگە ۇيا سالاتىن.
قازىرگى كەزدە تەك كاسپييدىڭ سولتۇستىك بولىگىندە كەزدەسەدى. قامىستى شابۋ نەمەسە ورتەۋ، براكونەردىڭ ىس-ارەكەتىنەن ولاردىڭ سانى كۇرت ازايىپ بارادى. وسى ورايدا ەكولوگتار سيرەك كەزدەسەتىن قۇستارعا جاقىنداۋعا، تاعام قالدىعىمەن جەمدەۋگە بولمايتىنىن كوپشىلىككە ەسكەرتىپ جاتىر.
- ەگەر دە اڭ نەمەسە قۇس ءتۇرى قازاقستاننىڭ قىزىل كىتابىنا ەنگىزىلگەن بولسا، ولارعا ءزابىر كورسەتۋ زاڭمەن قۋدالانادى. بۇل رەتتە كىنالى تۇلعا اكىمشىلىك ايىپپۇل تولەۋمەن شەكتەلمەي، وعان قاتىستى قىلمىستىق ءىس قوزعالۋى دا مۇمكىن. ەسكەكاياقتى قاناتتىلار تۇرىنە جاتاتىن قاراباي - ماڭعىستاۋعا كۇزگى جانە كوكتەمگى كوشى-قون كەزىندە ۇشىپ كەلەدى. كوشپەلى قۇستاردىڭ كۇش جيناپ، ساپارىن ءارى قاراي جالعاستىرۋىنا مۇمكىندىك بەرۋىمىز قاجەت، - دەيدى ەكولوگ كيريلل وسين.