1. جۋرناليستيكانىڭ اياسى وتە كەڭ: “كىمدە كىم اقپاراتقا يە بولسا، الەمدى سول بيلەيدى” دەگەن قاعيدا بار. بۇعان سوناۋ الاش قايراتكەرلەرىنىڭ ءبارى جۋرناليستيكانى ۇلتتىق قارۋ ەتكەنىن قوسىڭىز. “دالا ءۋالاياتىنان” باستاپ “قازاق”، “ايقاپ” تاعى باسقا باسىلىمداردى قيىن-قىستاۋ كەزەڭدەردە نە ءۇشىن شىعارعانىن ەسكە الساق تا جەتكىلىكتى. جۋرناليستيكا - ۇلتتىڭ ايبارى، ءقاراسوزدىڭ قايراعى!
2. جۋرناليستيكا - تازا مەملەكەتشىل تۇلعالاردى شىعاراتىن ماماندىق. جۋرناليستەر نەگىزىنەن ەلشىل، مەملەكەتشىل، ۇلتشىل كوزقاراستا تاربيەلەنەدى. ەلىم دەگەندە ەتىنەن ەت كەسىپ بەرۋگە دايار تۇراتىن مارتەبەلى ماماندىق!
3. كەز كەلگەن قوعامنىڭ نەگىزگى ۇستىنى - ادىلدىك! جەرگىلىكتى بيلىكتەن، سوتتان ادىلدىك تاپپاعاندار گازەت رەداكسيالارىنا اقيقات ىزدەپ، اراشا سۇراپ كەلەدى. ادىلەتتى قوعامنىڭ جارشىسى دا باسقا ماماندىق وكىلدەرى ەمەس، دەنى - جۋرناليستەر!
4. جۋرناليست - ەڭ ءبىرىنشى سۇراق قويۋ مۇمكىندىگىنە يە مامان. قوعامنىڭ جەتىستىگى مەن كەمشىلىگىن، ءىستىڭ ناتيجەسىن، اقجولتاي جاڭالىقتار مەن ەلدىڭ مۇڭ-زارىن ءبىرىنشى بولىپ جەتكىزەتىن جەدەلدىگى مەن وتكىرلىگى تاعى بار. پاتشادان باستاپ پاقىرعا دەيىن تىكەلەي سۇقبات الادى، كەز كەلگەن سالادان حابارى مول، كوزى قاراقتى، كوكىرەگى وياۋ؛ كەز كەلگەن جاعدايدا 24 ساعات جۇمىس ىستەي الاتىن قابىلەتى مەن داعدىسى بار جانداردى قايدان تاباسىز؟!.
5. كەز كەلگەن قوعام اقپاراتقا، اعارتۋشىلىق پەن تانىمدىق دۇنيەگە اسا ءزارۋ. وسىنىڭ ءبارىن قامتاماسىز ەتەتىندەر دە جۋرناليستەر!
6. قوعامعا - جوقشى، شىراقشى، ساقشى، ۇگىتشى، ناسيحاتشى، تىلەكشى ادامدار كەرەك دەسەك، قازاق قوعامىنىڭ قالعىپ كەتپەۋى ءۇشىن جانىن دا، بارىن دا سالىپ كەلە جاتقان، بىلىق-شىلىققا، جەمقورلىققا، ارامدىققا، قۋلىق-سۇمدىققا بەلشەدەن باتا قويماعان تازا ءبىر ماماندىق كەرەك بولسا، ونى وسى جۋرناليستەر اۋىلىنان تاباسىز.
7. كەز كەلگەن مەملەكەتتىڭ ءتىلى، ءدىنى، ءدىلى مەن ءسالت-داستۇرى، ۇلتتىق قۇندىلىقتارى - باعا جەتپەس بايلىق. ءتىلدىڭ تازالىعىن، سويلەۋ، جازۋ، وقۋ مادەنيەتىن قالىپتاستىراتىن دا جۋرناليستەر قاۋىمى! ءبىر سوزبەن ايتقاندا، مۇحتار ءماعاۋيننىڭ “قازاق جۋرناليستيكاسى مەن پۋبليسيستيكاسى اقىن-جازۋشىلاردان وق بويى وزىپ كەتتى” دەگەن باعاسى مەن مەملەكەتتىك كەڭەسشى ەرلان ءقاريننىڭ “قازاق جۋرناليستيكاسى - ۇلتتىق پارتيا مىندەتىن اتقارىپ وتىر”،- دەگەن ءبىر اۋىز ءپاتۋالى پىكىرى تالاي نارسەدەن حابار بەرسە كەرەك!