قاراعاندى ۇلتتىق زەرتتەۋ ۋنيۆەرسيتەتىنە پرەزيدەنت قاسىم-جومارت توقايەۆتىڭ 2025 جىلعى 12 تامىزداعى جارلىعىمەن ۇلتتىق مارتەبە بەرىلدى، دەپ حابارلايدى aqshamnews.kz قاراعاندى وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
وسىعان وراي وقۋ ورنىندا وتكەن كەزدەسۋگە عىلىم جانە جوعارى ءبىلىم ءمينيسترى ساياسات نۇربەك، قاراعاندى وبلىسىنىڭ اكىمى ەرماعانبەت بولەكپايەۆ، ءماجىلىس دەپۋتاتتارى جانە پروفەسسورلىق-وقىتۋشىلىق قۇرام قاتىستى.
جاڭا مارتەبە ۋنيۆەرسيتەتكە اكادەميالىق جانە عىلىمي دەربەستىكتى كەڭەيتۋگە جول اشادى. ول جەتەكشى عالىمدار مەن قارجى تارتۋ مۇمكىندىگىن ارتتىرىپ، حالىقارالىق ءبىلىم كەڭىستىگىندەگى ورنىن نىعايتادى.
«ۋنيۆەرسيتەتتىڭ ۇلتتىق مارتەبەگە يە بولۋى – تاريحي قادام. بۇل مارتەبە وقۋ ورنىنا يكەمدىلىك پەن اكادەميالىق ەركىندىك بەرەدى. ەندى ۋنيۆەرسيتەت ءوز ءبىلىم بەرۋ باعدارلامالارىن ازىرلەپ، ۇزدىك وقىتۋشىلاردى تارتا الادى، جاڭا زەرتحانالار اشىپ، ونەركاسىپتىك كاسىپورىندارمەن بىرلەسكەن جوبالاردى ىسكە قوسۋعا مۇمكىندىك الادى. مۇنىڭ بارلىعى تالانتتى جاستاردى تارتۋعا ىقپال ەتپەك. ۇلتتىق مارتەبە – ءاردايىم قوسىمشا ارتىقشىلىق»، – دەدى ساياسات نۇربەك.
مينيستر سونداي-اق مەملەكەت باسشىسىنىڭ تاپسىرماسىمەن قاراعاندىدا ۇلىبريتانيانىڭ الەمدىك ۇزدىك 200 ۋنيۆەرسيتەتىنىڭ قاتارىنا كىرەتىن ەكسەتەر ۋنيۆەرسيتەتىنىڭ فيليالىن اشۋ ماسەلەسى قارالىپ جاتقانىن حابارلادى. بۇل – كەن ءىسى مەكتەبى ساقتالعان جالعىز شەتەلدىك وقۋ ورنى، سوندىقتان يندۋسترياعا باعىتتالعان ءوڭىر ءۇشىن اسا وزەكتى.
ءوڭىر باسشىسى ەرماعانبەت بولەكپايەۆ ۋنيۆەرسيتەت ۇجىمىن قۇتتىقتاپ، بۇل مارتەبەنىڭ كوپجىلدىق ەڭبەكتىڭ، ساپالى ءبىلىم بەرۋدىڭ جانە عىلىمي الەۋەتتىڭ ناتيجەسى ەكەنىن اتاپ ءوتتى.
«بۇگىندە مەملەكەت باسشىسىنىڭ تاپسىرماسىمەن وڭىرلەردە عىلىم مەن ءبىلىمدى دامىتۋ باستى باسىمدىقتاردىڭ ءبىرى بولىپ وتىر. قاراعاندى ۋنيۆەرسيتەتىنىڭ جەتىستىكتەرىنىڭ جوعارى باعالانۋى – سونىڭ ايقىن دالەلى. ءبىز وقۋ ورنىمەن بىرلەسە جۇمىس ىستەۋگە دايىنبىز. مۇندا جاسالىپ جاتقان عىلىمي ىزدەنىستەردىڭ بارلىعى ءوڭىر ءۇشىن ماڭىزدى. ءبىز ۋنيۆەرسيتەتتى ارىپتەس قانا ەمەس، قاراعاندى وبلىسىن دامىتۋداعى جانە تۇرعىنداردىڭ ءومىر ساپاسىن ارتتىرۋداعى سەنىمدى سەرىكتەسىمىز دەپ بىلەمىز. قاراعاندىنى عىلىم مەن ءبىلىمنىڭ ورتالىعىنا اينالدىرۋ – ورتاق ماقساتىمىز»، – دەدى ءوڭىر اكىمى.
ۇلتتىق مارتەبەنىڭ ۋنيۆەرسيتەتتىڭ العاشقى رەكتورى، اكادەميك ەۆنەي بوكەتوۆتىڭ 100 جىلدىق مەرەيتويىمەن تۇسپا-تۇس كەلۋى دە ەرەكشە مانگە يە.
«وسى ۋنيۆەرسيتەتتىڭ تۇلەگى ءارى ءماجىلىس دەپۋتاتى، وبلىستىڭ تۋماسى رەتىندە بۇل جاڭالىققا شىن جۇرەكتەن قۋانىشتىمىن. بۇل – پروفەسسورلىق-وقىتۋشىلىق قۇرامنىڭ قاجىرلى ەڭبەگىنىڭ جەمىسى. ۋنيۆەرسيتەتتى تاعى دا شىن جۇرەكتەن قۇتتىقتايمىن»، – دەدى ءماجىلىس دەپۋتاتى اسحات ايماعامبەتوۆ.
كەزدەسۋ بارىسىندا قاتىسۋشىلار ۇلى عالىم ەسكەرتكىشىنە گۇل شوقتارىن قويدى.
ءقازىر وقۋ ورنىندا 14 مىڭنان استام ستۋدەنت، ماگيسترانت جانە دوكتورانت ءبىلىم الۋدا.
12 فاكۋلتەتتە 200-گە جۋىق ءبىلىم بەرۋ باعدارلاماسى جۇزەگە اسىرىلىپ كەلەدى. بوكەتوۆ ۋنيۆەرسيتەتى بۇگىندە ەلىمىزدەگى جەتەكشى كوپسالالى جوعارى وقۋ ورىندارىنىڭ قاتارىنان لايىقتى ورىن العان.